GOEIE SPEENKALFPRYS LÊ STEWIGE FONDASIE VIR HERSTEL NÁ DROOGTE
NÁ ’n moeilike jaar weens die droogte en hoë graanpryse in 2016 het dit vanjaar aansienlik beter met veeboere gegaan. Vir ’n groot deel van die jaar het beesboere goeie speenkalfpryse geniet.
Mnr. Gerhard Schutte, uitvoerende hoof van die Rooivleisprodusenteorganisasie (RPO), het in September gesê die hoër pryse word aangedryf deur redelike uitvoer van rooivleis uit SuidAfrika. Die droogte het ook tot ’n speenkalftekort gelei.
Weens die invoerpermitkwessie word minder speenkalwers uit Namibië ingevoer en met die lae mielieprys kon voerkrale bekostig om meer vir kalwers te betaal.
In Augustus het die gemiddel de prys al op R35,09/kg gestaan – 71% hoër as ’n jaar vantevore. Die hele rooivleisbedryf se omset beloop nou meer as R78 miljard.
Mnr. Koos van der Ryst, voorsitter van die RPO, het in Oktober daarop gewys dat SuidAfrika 2 miljoen koeie nodig gaan hê om sy nasionale beeskudde weer op te bou ná die afgelope drie jaar se droogte. Daar is nou net 85% van die vee wat daar in 2013 was.
Boonop groei die vraag na SuidAfrikaanse rooivleis. Daarom moet boere tot elke prys daarna streef om die bekenklouseervrye status te behou. Wat ook aandag kort, is ’n nasionale naspeurbaarheidstelsel vir vleis, beter bestryding van roofdiere en die bekamping van veediefstal.