OPKOMENDE BOERE SOEK VENNOTE
’N HOOGTEPUNT vir die African Farmers’ Association of South Africa (Afasa) vanjaar was sy transformasiekongres wat begin Augustus gehou is. Verskeie hooggeplaaste politici en ander leiersfigure het ’n beroep op die Regering en opkomende boere gedoen om by gevestigde boere te leer.
Mnr. Nhlanhla Nene, voormalige Minister van Finansies en tans raadgewer by die Thebe-beleggingskorporasie, het gesê gevestigde vennootskappe tussen wit en swart boere is nodig om die radikale ekonomiese transformasie van die landbou aan te vuur.
Hy meen wit boere se praktiese ervaring moenie geringgeskat word nie. ’n Mens kan al die kennis uit ’n handboek hê, maar sonder ervare boere se hulp gaan ’n nuweling dit nie maak nie. Daarom het die landbou almal – wit en swart boere – nodig.
Mnr. Senzeni Zokwana, Minister van Landbou, Bosbou en Visserye, het mentorskap aangemoedig aan die hand van mnr. Bobby Godsell, voormalige uitvoerende hoof van AngloGold, wat ’n mentor was vir mnr. Patrice Motsepe, mynmagnaat en een van die rykste mense in Afrika.
Me. Lindiwe Zulu, Minister van Kleinsake-Ontwikkeling, meen die landbou moet beskerm word, maar gevestigde boere moet ter wille van hul eie volhoubaarheid en oorlewing kyk hoe hulle ander kan help.