Talle dienste tot voordeel van die bedryf
VEEBOERDERY kan net winsgewend, volhoubaar en internasionaal mededingend wees as boere die regte opleiding, inligting en voorligtingsdienste ontvang. Die Regering voorsien nie meer dié dienste aan kommersiële rooivleisprodusente nie. Dit het ook in die private sektor grootliks tot ’n stilstand gekom.
Boere verwag dus van die Rooivleisprodusente-organisasie (RPO) om dié dienste aan hulle te lewer, sê mnr. Gerhard Schutte, hoofbestuurder van die RPO.
“As boere die regte inligting ontvang, bydraes oor beleidsake lewer en aan ontwikkelingsprojekte deelneem, kan dit Suid-Afrika meer selfvoorsienend ten opsigte van rooivleisproduksie maak.
“Dit sal onder meer die voordeel inhou dat die betalingsbalans verbeter, ekonomiese groei verseker en ’n groter bydrae tot voedselsekerheid gelewer word.”
Met vee word op meer as 70% van die landbougrond in die land geboer. ’n Stabiele rooivleisbedryf wat doeltreffend bestuur word, sal ook ’n groot bydrae lewer om dié natuurlike hulpbron te bewaar, sê Schutte.
Volgens die Buro vir Voedsel- en Landboubeleid (BFAP) sal die vraag na bees- en skaapvleis teen 2020 met onderskeidelik 25% en 20% groei. Dit is ’n groot knelpunt om produksie daarmee tred te laat hou.
Produksie-ontwikkeling is dus uiters belangrik vir die vooruitgang van die rooivleisbedryf.
Die RPO onderneem die volgende funksies ten opsigte van produksie-ontwikkeling: Inligting/kommunikasie In ’n gedereguleerde rooivleisomgewing is betroubare statistiek en inligting wat objektief geïnterpreteer is, noodsaaklik om besluitneming oor die produksie en die bemarking van kleinvee en beeste moontlik te maak. Opleiding en voorligting Veeboere kan net winsgewend en mededingend wees as hulle voorsien word van tersaaklike opleiding en vaardighede. Provinsiale en nasionale beleidsformulering en bevordering van die bedryf Die Grondwet van Suid-Afrika bepaal dat boerderybedrywighede ’n provinsiale aangeleentheid is. Dit is belangrik dat veeboere bydraes kan lewer oor provinsiale en nasionale beleidsake. Dit sluit in deelname in beleidsbepaling en die afhandeling van wetgewing, asook deelname aan beleidsplatforms om produsente-aangeleenthede te hanteer. Die meeste van die aksies wat die RPO namens rooivleisprodusente verrig, is op nasionale vlak. Dit sluit onder meer skakeling met regeringstrukture in om te verseker dat ’n beleidsraamwerk geskep word wat ’n bemagtigende omgewing vir rooivleisproduksie skep. Internasionale mededinging Suid-Afrika is die grootste mark vir rooi- vleis en vee in Suider-Afrika. Die RPO is deurlopend in gesprek met belanghebbendes oor markregulasies, dieregesondheid, doeane-, SPS- en handelsaangeleenthede in dié streek. Dieregesondheid Doeltreffende en winsgewende boerdery sowel as veilige en gesonde produkte verg dat dieregesondheid op optimale vlakke gehou word. Voorkoming van veediefstal Noue samewerking tussen die veediefstaleenheid en die bedryf is belangrik om die stryd teen veediefstal te bestuur. Bemagtiging Die opleiding van plaaswerkers op kommersiële bees- en kleinveeplase sal produktiwiteit bevorder. Projekte/wetgewing Altesame 88 wette reguleer die landbou in Suid-Afrika. Talle daarvan word tans gewysig. Dit is belangrik dat kommentaar op dié wysigings en nuwe wetgewing vanuit ’n produsente-oogpunt gelewer word. Voorkoming van roofdierskade Skade wat weens roofdiere veroorsaak word, is tans die grootste enkele bedreiging vir die kleinveebedryf met ’n jaarlikse verlies van R1,4 miljard. Die verlies in die grootveebedryf word tans bepaal, maar aanduidings is daar dat dit meer as R600 miljoen per jaar is. Markbeskerming Die bedryf het ’n ad valorum-tarief van 40% op die meeste soorte rooivleis wat ingevoer word. Dit is belangrik dat die waardes van skeepsvragte gemonitor word en dat stappe gedoen word waar nodig.