‘BEURSSKEMA VERVUL IN DIÉ DOEL’
DIE Vleisbedryfstrust (VBT) slaag daarin om een van die belangrikste van sy doelwitte – om ’n bydrae tot die verbetering van die rooivleisbedryf te lewer – te bereik.
Só sê dr. Vuyelwa Penxa, voorsitter van die SA Kwalifikasie-owerheid (SAQA), wat namens die trust onderhoude gevoer het met ontvangers van VBT-beurse vanaf 2014 tot 2017. Penxa wou bepaal of die beursskema ’n opbouende bydrae tot die rooivleisbedryf lewer.
Die meeste ontvangers van die beurse werk tans in die navorsings- en ontwikkelingsektor van die vleisbedryf.
Alle burgers van die Republiek van Suid-Afrika wat vir toelating tot ’n meesters- of doktorsgraad aan ’n erkende tersiêre instelling in aanmerking kom, kan aansoek doen om ’n beurs. Die seleksiekriteria van beurshouers vind op die grondslag van die student se uitnemendheid plaas. Die VBT maak seker dat Suid-Afrikaanse demografiese en geslagsbelange in aanmerking geneem word wanneer beurse toegeken word.
Die beursskema het in 2009 begin en 28 studente is daardeur bevoordeel. Altesame 22 beurse is aan vroulike studente toegeken en ses aan manlike studente. Daar was 14 swart studente, wat beteken dat 50% van die studente wat in die tydperk van 2014 tot 2017 beurse ontvang het, swart was.
’n Neiging het oor die jare ontwikkel dat die meeste nagraadse beurse aan ’n enkele universiteit toegeken is. Dié instelling is die Universiteit van Pretoria, wat 12 beurshouers opgelewer het. Studente aan die Universiteit van Fort Hare het ses beurse ontvang. Die Universiteit van KwaZulu-Natal het vanjaar
vir die eerste keer ’n student gehad wat vir ’n VBT-beurs gekwalifiseer het.
’n Ontleding is gedoen oor die historiese verspreiding van studievelde. Dit het getoon dat daar sekere studierigtings is wat afgeskeep word. Higiëne, dieregesondheid en genetika het oor die jare meer aandag gekry. Omgewing, reproduksie, voeding en ekonomie en bemarking het die minste aandag gekry. Daar is ook geen navorsing oor weiding en grasvelde nie.
Pexna het ook bevind dat diereproduksie en produksiestelsels ontwikkel moet word wat slegs beperkte medisinale steun benodig. Die VBT-beursskema kan die moontlikheid oorweeg om die leiding te neem en studente aan te moedig om dié studieveld te betree. Só kan studente wat in immunologie opgelei is, dié belangrike studierigting in die toekoms ontwikkel. Dit sal ook ’n rigting wees waarin post-doktorale beurse ’n groot leemte kan vul.