Wagyu: Groot mark vir vleis
Die Aussies praat met gesag oor die bemarking van die Wagyu – as lewende hawe én vleis. Mnr. Graham Trustcott, hoof van die Australiese Wagyu-vereniging, sê die Suid-Afrikaanse bedryf kan in Australië se voetspore volg.
Graham sê Meat and Livestock Australia (MLA) se marknavorsing wys die uitvoerpotensiaal vir Wagyu-vleis is iets ysliks. Australië voer sowat 80-90% van sy Wagyu-vleis uit na lande en streke, soos Amerika, die Europese Unie en China.
Verlede jaar het die Australiese Wagyu-bedryf byna 40 000 ton Wagyu-vleis verkoop. Teen die huidige groeikoers sal daar binne vyf jaar sowat 74 000 ton vleis wees wat bemark moet word.
Die Australiese bedryf glo Wagyu se waarde lê daarin dat die genetiese materiaal ’n verskil kan maak in mense se eetervaring as hulle die vleis koop. Graham sê rasegte Wagyu-bulle behaal tans sowat $8/kg (sowat R82/kg) per lewende gewig in Australië. Dis meer as dubbel as die sowat $3,50/kg (R36) wat Angus-boere kry.
Tans is daar 85 Wagyu SA-lede en sowat 2 000 koeie. Hulle wil oor tien jaar 340 lede en 15 000 koeie hê. “Vanjaar is sowat 2 500 embrio’s en 20 000 semenstrooitjies ingevoer. Die telers is in alle provinsies, juis omdat die Wagyu aanpas in droë én nat omgewings,” sê dr. Michael Bradfield, uitvoerende hoof van Wagyu SA.
Graham glo Suid-Afrika se boere kan plaaslik baie Wagyu-vleis verkoop. “Onthou, 16% van die plaaslikee mark is welgesteld en 22% behoort tot die middelklas. Byna 40% van die bevolking kan dus die vleis bekostig. Dit is byna 24 miljoen verbruikers wat vir premieprodukte kan betaal; ’n veel groter plaaslike mark as in Australië, met sy 25 miljoen mense.”