‘Ek spaar nooit op presisieboerdery nie’ — Gerhard Bruwer
Hoëtegnologie-boerderybeginsels het die Genade-boerdery op Douglas se opbrengste met sowat 10% opgestoot, maar ook produksiekoste met ongeveer 10% verminder.
Dít is hoekom hy nooit op hierdie beginsels sal spaar nie, sê mnr. Gerhard Bruwer, oudste seun van mnr. Vickie Bruwer. Die boerdery is in 2016 aangewys as ’n GWKikoon in gewasproduksie.
Die boere in die omgewing verwys na hoëtegnologieboerdery as HTB. Dit is ’n omvattende projek wat die afgelope ses jaar deur GWK aangevuur word en die doel is om aan boere ’n volledige presisieboerderydiens te verskaf.
“Dit begin met besproeiingskedulering. Dan kyk ons na die kunsmis wat jy gee en die kultivars wat jy op sekere lande plant. Ons kyk met satellietbeelde uit die lug na die chlorofil in die plant om die goeie en swak plekke op die landerye te identifiseer. Ons kyk ook na die NDM-(normalised differenced moisture) indeks,” sê Gerhard.
Hulle bemes nie net om te bemes nie,
maar bestudeer wortelontwikkeling en verdigtingslae met profielgate. Hulle gebruik ook die duisendkorrelmassa by koring om te bepaal hoeveel hulle moet plant om ’n spesifieke hoeveelheid halms te oes. Dan bepaal hulle die grondstatus, maak regstellings en werk ’n spesifieke bemestingsprogram per plaas of spilpunt uit.
“Dis spoon feeding, want jy gee vir die plant presies wat hy nodig het.”
Dit geld ook besproeiing, en die Bruwers maak deesdae hul somme volgens rand per millimeter water toegedien. Só het hulle besef dis lonender om meer grondbone en minder koring en mielies aan te plant. Grondbone gebruik 30% minder water, daarom vaar dit R/mm beter as mielies of koring. Op dié manier kry hulle dit reg om dieselfde omset te handhaaf, ondanks ’n 15%-beperking op hul besproeiingswater.
Deurslaggewend tot die sukses van HTB is ’n vinnige reaksietyd – tekorte word byvoorbeeld onmiddellik reggestel.
Dit kos sowat R140/ha om aan die presisieprojek deel te neem. Kleingeld, meen Gerhard. “Ons kan nie bekostig om rond te speel nie, maar moet presies weet wat aangaan.”