Werp alles in stryd teen raaigras
Die stryd teen raaigras – een van die hardnekkigste onkruide ter wêreld wat ook weerstand teen die meeste verskillende onkruiddodergroepe het – sal nié met onkruiddoders alleen gewen word nie.
“Raaigras verander gedurig, daarom moet ons die metodes wat ons gebruik om dit te bekamp, gereeld verander,” sê dr. André Schreuder, uitvoerende hoof van Villa Crop Protection.
Dis ’n wêreldwye probleem – en SuidAfrikaanse boere kan veral uit die foute van hul Australiese eweknieë gaan leer. Maar op die ou end is daar nie resepte nie en elke boer moet sy eie planne vir sy plaas se toestande maak.
Volgens dr. P.J. Pieterse aan die departement agronomie by die Universiteit Stellenbosch, stel onkruidwetenskaplikes en landboukundiges ál meer geïntegreerde strategieë voor om raaigras te bekamp. Dit sluit chemiese en nie-chemiese metodes in.
Sy beste raad? “As jy weerstand het, bestuur vir weerstand, en as jy nie weerstand het nie, bestuur in elk geval vir weerstand.”
Navorsing op die navorsingsplaas Langgewens in die Swartland het bewys dat wisselbou met ’n eenjarige weidingsgewas (soos medics) ’n goeie manier is om raaigrasdruk in toom te hou. Dis belangrik om vooropkomsonkruiddoder in die volgorde (a) trifluralien, (b) Sakura® (reg.nr. L9082, Wet 36 van 1947), Boxer (reg.nr. L8222) en Avadex (reg.nr. L7892) en (c) Kerb (reg. nr. L5310) af te wissel.
Afwisseling is nodig sodat ’n ensiem in die plante nie die onkruiddoder afbreek voor dit sy werk doen nie. Ander redes kan ook lei tot weerstand, soos ’n bevolkingsontploffing in mikro-organismes wat Kerb afbreek nog voor dit die onkruid kan takel.
Ander wenke wat P.J. gee, is: “Saai net gehaltesaad, want sterk groeiende en gesonde plante ding beter met onkruid mee.” Die regte saaidigtheid (vir ’n onderdrukkende plantestand) kan ook help. In Australië het navorsers bevind minstens 200 plante per vierkante meter is nodig om raaigras te onderdruk. Goeie, mededingende gewasse, in volgorde van mededingingsvermoë, is rog, korog, kanola, koring, gars, ertjies en lupiene. –