Mielies gee volgehoue groei
Klem op saamgestelde groei en skaalekonomie, asook ’n balans tussen bemarkingswaagmoed en gesonde finansiële bestuur, het die kroon as Graan SA se Graanboer van die Jaar aan mnr. AC van Wyk van Bultfontein besorg.
Dié sewendegeslagboer van die plaas Warmhoek skoei sy sukses op maksimum groei – gemiddeld 26% per jaar die afgelope 15 jaar, ondanks die droogte van 2015 tot 2017. “Ons het oor die jare min energie vermors omdat ons min goed doen wat in die daaropvolgende jaar oor of anders gedoen hoef te word. As jy gedurig eksperimenteer, moet jy ná ’n paar jaar dikwels die handdoek ingooi.” Die boerdery het vanjaar na ’n volledige, winsgewende osboerdery oorgeskakel.
Die opbou en instandhouding van die grond op lang termyn weeg vir hom die swaarste, terwyl hy ook op kort termyn finansieel volhoubaar boer. “Ek sal ophou boer as ek nie op kort termyn kan oorleef nie of as ek nie die grond in ’n beter toestand kan agterlaat as waarin ek dit gekry het nie.”
Hy spits hom hoofsaaklik op strategiese beplanning en bemarking toe, terwyl die uitvoerende pligte die verantwoordelikheid van plaasbestuurders is.
Sy keuse van mielies as hoofgewas is eenvoudig. “Ek plant tans net mielies omdat dit vir my die winsgewendste is. In die afgelope 15 jaar het die boerdery ’n gemiddelde groei-
koers van 26% per jaar gehandhaaf. Enkelgewas-mielieboerdery op watertafellande bly die manier om die groei te bewerkstellig.”
Volgens hom put sy stelsel nie die grond uit nie en kan dit agronomies volhoubaar in die Wes-Vrystaat gedoen word. Hy laat 15% tot 20% van die landerye oorlê en pas ook verminderde bewerking toe.
AC is alleen vir die bemarking van sy graan verantwoordelik. “Ek verkies fisieke graan pleks van ‘papiermielies’ of opsies op Safex.”
In die geval van mieliebemarking verkies hy om self die risiko te dra – én self die geld te maak. “Ek hou van ’n baie eenvoudige bemarkingsopset met ’n betroubare koper.” Hy bemark feitlik alle graan deur Senwes, met wie hy plaaslaaikontrakte beding.