Skaars wild en bewaring werk saam
Of BJ Vorster Game Breeders R27 miljoen sal kry vir Mopanie – die swartwitpensbul wat hulle in 2015 by mnr. Piet Warren gekoop het – kan ’n mens net raai. Dié bul se horings het pas die 50”-kerf oorgesteek en hy teel pragdiere in die trop van 30 koeie waar hy op die Vorster-plaas, Thiergarten, in Letsitele naby Tzaneen loop.
“Ons sal hom nie maklik verkoop nie,” sê mnr. Barend Vorster, hoof van dié familieboerdery se wildbedryf. “Ons het verlede jaar twee keer meer verdien vir vroulike diere wat dragtig is met sy kalwers as met dié van ander bulle. Hy is elke sent werd en hy bly net hier.”
In Mopanie se trop is daar vroulike diere afkomstig van die meeste topbulle in Suid-Afrika. “Ons teelprogram bestaan uit drie topbulle wat geensins aan mekaar verwant is nie. Tussen hulle het ons die keuse om van ons top- vroulike diere van verskillende bloedlyne by hulle te laat loop.”
Deesdae, sê Barend, is die neiging weer na ekstensiewe weidingkampe toe, maar met intensiewe bestuur. “Een van die swartwitpense se grootste bedreigings is die toename van inwendige parasiete.”
Daarom doseer hulle gereeld deur verskillende middels afwisselend in die bokke se voer in te meng. Barend gebruik ’n doseringsprogram gegrond op die hoeveelheid parasiet-eiertellings wat gereeld met behulp van mismonsters gemonitor word.
Die Vorsters se suksesgeheim is om die natuur so min as moontlik te versteur terwyl dit intensief bestuur word. Hulle ploeg die geld wat uit teelprogramme verdien word, in by die bewaring van bedreigde diersoorte, soos wildehonde.
Die honde het sowat 14 jaar gelede hul verskyning op Thiergarten gemaak.
Barend se pa, Edward, het besef die vier honde wat daar aangekom het, gaan nie lank oorleef in ’n omgewing waar wild- en beesboerdery die norm is nie.
Ná ’n lang proses het hy toestemming gekry om die vier honde op sy plaas toe te span en te beskerm.