Bewaringsbewerking kán werk in Noordwes
Omvattende internasionale studies oor in watter soort grond en klimaat bewaringsbewerking die grootste kans op sukses het, dui aan dat die noordweste van Suid-Afrika – anders as wat eers geglo is – uiters geskik is vir bewaringsbewerking met ’n deklaag.
Vir die eerste studie is die resultate van 61 proewe in Amerika en Kanada ontleed om die invloed van bewerking op mielie- en soja-opbrengste te bepaal. Dit het 687 jaaren plek-kombinasies verteenwoordig. Die tweede studie, waarvan die resultate onlangs gepubliseer is, is ’n meta-ontleding van 678 bewaringsbewerkingproewe oor 50 gewasse en 63 lande heen.
Uit albei kan afgelei word dat die ligging, klimaat en grond van Noordwes besonder goed geskik is vir bewaringsbewerking, het dr. André Nel, ’n onafhanklike akkerboukundige, op die Ottosdal-geenbewerkingklub se jaarlikse bewaringslandboukonferensie gesê. Nog vereistes vir makliker bewaringsbewerkingsukses is ’n halfwoestynagtige klimaat: Warm en met gereelde droogtes, asook grond met ’n lae waterhouvermoë.
Die waarde van ’n deklaag om die afloop van water te stuit, kan egter nie misgekyk word nie. In ’n ouer proef naby Potchefstroom is getoon dat die verskil in afloop tussen bedekte en onbedekte grond waar 316 mm reën geval het, 194 mm is. Meer as 2 ton mielies en 2 ton oesreste kon per hektaar gelewer word.