Biologiese produk dokter brakgrond
Die goggas in die grond het skielik ’n goudmyn geword vir mnr. Cordré Smith, groente-en-vrugteboer van Erfdeel tussen Ceres en Touwsrivier. Hy het vier jaar gelede 12 ha appelbome op sy plaas gevestig. Dit was op dieselfde grond waar die jaar vantevore appels gestaan het, sonder om die grond ordentlik voor te berei, want die jong boompies was op kort kennisgewing beskikbaar. Die risiko van appel-herplantsiekte was dus groot.
Die grond is diep losgemaak met ’n skeurploeg en die bome is geplant. Toe die somer kom, het die boompies gebot, maar van groei was daar nie sprake nie en Cordré het besef herplantsiekte het dié boompies beetgepak.
Die volgende seisoen is daar vyf maande lank maandeliks 1 000 liter kompostee en 1 liter van BacTech se Bactolife per hektaar deur die besproeiing toegedien. Die Bactolife bestaan uit ’n verskeidenheid Bacillus-bakterieë wat groei en wortelontwikkeling aanhelp. Die bome het stelselmatig begin herstel en vandag, drie jaar later, is daar geen teken meer dat dié boord byna gevrek het nie.
Twee jaar gelede het Cordré die plaas Tiervlakte naby Touwsrivier gekoop en daar was reeds ’n uitvoerkontrak gereed vir pampoene. Die gemiddelde opbrengs op die plaas was 30 ton per hektaar, maar Cordré was vasbeslote dat dit hoër kan wees as hy die hoë sout-inhoud van die grond kon regstel.
Die pampoene word onder plastiekgrondbedekking gevestig en bemesting word deur besproeiing met druppers – ook onder die plastiek – toegedien. Die somerpampoene van 2015 was die eerste oes wat Cordré op die plaas geplant het en hy het besluit om biologiese produkte te gebruik om die brakgrond te herstel. Voor planttyd is 300 ml van BacTech se NoSo+ per hektaar toegedien, weer in die tweeblaarstadium en weer net voor blomtyd. Cordré het sy normale bemestingsprogram gevolg en toe hy klaar geoes is teen Maart 2016, het hy meer as 59 ton pampoene per hektaar geoes.
Dié behandeling het so goed gewerk dat die uieplantjies wat die volgende somer op dieselfde land gevestig is, beduidend voordeel daaruit getrek het. Hulle het baie beter presteer as die uieplantjies wat op grond geplant was wat nie met die biologiese middels behandel is nie.