GWK se presisieplan sit boere op volgende vlak
Tegnologie en data is die toekoms. Dáárom het GWK ’n presisieboerderydiens op die been gebring om boere te help om vooruit te gaan. En sedert hulle in 2006 met hul hoëtegnologieboerdery (HTB) begin het, het fokusklante se gemiddelde koringopbrengs met 1,2 t/ha en die gemiddelde mielie-oes met 2,2 t/ha geklim.
Dit beteken basies dat grondfisika, -chemie en -water alles in ag geneem word. Met afstandswaarneming en -monitering word oplossings vir probleemgebiede op spilpuntvlak gevind. Dit bring natuurlik opbrengsverbeterings mee.
Die diens het die afgelope twee jaar momentum gekry en word aan byna 90 besproeiingsboere oor sowat 20 000 ha (somertyd) en 22 000 ha (wintertyd) gelewer.
Dis ’n intensiewe, tydrowende stelsel, maar die boere kla nie, want daarvoor is die voordele net te groot.
“Beste praktyke is ons einddoel en ons doen alles om daarby uit te kom,” sê mnr. Dup Haarhoff, hoof van landboukundige dienste by GWK Agri op Douglas. Hulle kyk eers na die basiese goed, soos waterverspreiding, -infiltrasie en afloopbestuur, met die oog daarop om gesonde wortels te ontwikkel. Dan kom doeltreffende besproeiingskedulering aan die beurt. Hulle skenk ook aandag aan saadbeddingvoorbereiding, plantaksie en plantestand.
Die volgende stap is om grond- en chemiese kaarte te bestudeer. “Die korreksies is op aanbevelingskaarte wat die boer in sy strooier druk om afwisselend kunsmis te gee.”
Afstandswaarneming skop dan in. GWK is die eerste maatskappy in Suid-Afrika wat Sentinel-beelde op ’n kommersiële grondslag gebruik. Dit verskaf elke tien dae ’n beeld wat ’n goeie tydlyn van byvoorbeeld gewasontwikkeling verskaf. Boere kry NDVI-beelde (normalised difference vegetation index )en MI-beelde (’n vogindeks van die plant en die grond) om die tydlyn aan te dui. Twee keer per seisoen word ook ’n meer gedetailleerde spot-beeld geneem, wat onder meer waterverspreiding, die doeltreffende aanwending van water en siektes aandui. Opbrengskaarte en temperatuursensors wat uurliks lesings doen, help ook met monitering.
Voor die nuwe seisoen begin, word die afgelope seisoen met die boer bespreek. Boere kan dan tydig optree in die nuwe seisoen – dit is as ’t ware ’n “wenresep” om ’n sekere opbrengs na te jaag. “Ons sê vir elke boer waarop hy in sy eie toestande klem moet lê in die seisoen wat voorlê.”
Die seisoensbespreking word afgesluit met ’n ekonomiese ontleding, waarin hulle onder meer kyk hoeveel die boer vir produksiemiddele betaal het, vergeleke met die ander fokusklante.
“In die toekoms gaan ons ál meer na ’n mikrovlak beweeg.”