SA LEI MET KLIMAATSNAVORSING, MAAR SUKKEL MET TOEPASSING

WANNEER dit by navorsing oor klimaatsverandering kom, is Suid-Afrika een van die wêreldleiers. Só het prof. Bob Scholes, ereprofessor in ekologiestelsels aan die Universiteit van die Witwatersrand, op die nasionale wetenskap-en-tegnologieforum se debat oor klimaatsverandering gesê. Dit is by Emperor’s Palace in Boksburg gehou.

“Suid-Afrika hou elke twee jaar ’n byeenkoms om te bepaal of ons nog op koers is met navorsing. Wat navorsing oor klimaatsverandering betref, blaf ons saam met die groot honde. Trouens, Suid-Afrika lewer sowat ’n derde van die wêreld se navorsing oor klimaatsverandering.

“Wat egter kommerwekkend is, is dat die land verder stroomaf baie minder aktief is.

“Dit beteken eenvoudig dat ons wél die struikelblokke kan identifiseer en planne kan beraam om hierdie uitdagings die hoof te bied.

“As dit egter by die daadwerklike implementering van hierdie planne kom, is ons nog ver agter die res van die wêreld,” het Scholes gesê.

Een manier waarop die situasie verander kan word, is om beleid te verander, het hy gesê.

“Daar is ’n wanopvatting dat slegs regerings beleid skep. Dit is egter onwaar. Beleid word elke dag deur die private sektor ook geskep – vanaf individuele besluite tot besluite op sakevlak.

“Dit sal ons as wetenskaplikes se verantwoordelikheid word om hierdie beleid te probeer beïnvloed. Ons sal dit moet doen sonder om die integriteit van ons navorsing in die gedrang te bring,” het Scholes gesê.