KOM AGTER WATTER MIKROBES WERK IN JOU GROND
Watter mikrobes word in jou grond gehuisves? Hoeveel is daar en werk hulle vir jou?
Dít is van die vrae wat Sporatec, ’n vernuwende projek by die Universiteit Stellenbosch wat deur INNOVUS ondersteun word, kan help beantwoord.
Sporatec lê klem op funksionele organismes in die grond. Die onderneming het ontstaan uit tegnieke wat prof. Karin Jacobs en haar studente in haar mikrobiese ekologieen mikologielaboratorium ontwikkel het.
Funksionele organismes is belangrik omdat ’n hoë grondgesondheid gewoonlik gevind word waar ’n groot verskeidenheid grondfauna en mikrobes teenwoordig is, terwyl grondgehalte die grond se vermoë is om sekere funksies uit te voer.
Mikrobes, Bacillus -en Rhizobium-bakterieë en verskeie mikorisa-swamme speel ’n belangrike rol in voedingstofkringlope, soos die koolstof-, stikstof- en fosforsiklusse.
Sekere mikrobes in die grond kan plante op ’n natuurlike manier van stikstof voorsien deur die prosesse van stikstofbinding en die produksie van urease en ammoniak.
Ander mikrobes produseer fosfatase, wat help om die beskikbaarheid van fosfaat vir plante te verhoog.
Sporatec kan die verskeidenheid en hoeveelheid mikrobes meet en boere inlig oor hul grond se vermoë om voedingstowwe aan gewasse te verskaf sonder ekstra misstof.
Sporatec kan DNS aan die grond onttrek. Dit word dan ontleed om vas te stel of spesifieke mikro-organismes, soos stikstofbinders of fosfatase-produseerders (wat betrokke is by die koolstof-, stikstof- en fosforkringlope), in die grond teenwoordig is. Die ontledings kan die getal en verskeidenheid organismes in ’n monster vasstel en sodoende ’n diversiteitsprofiel vir die monster opstel.
GENEGETAL IN ROOIBOSGROND
Die laboratorium kan die funksionele diversiteit en vermoë van grond bepaal deur die mikro-organismes daarin te identifiseer. Sporatec kan ook nuwe grondmonsters met oues vergelyk om te kyk of mikrobiese diversiteit en funksionaliteit verander het as gevolg van veranderings in grondbestuurspraktyke.
Dit kan nuttige inligting wees vir enige boer wat minder kunsmis wil toedien, maar nie weet of sy grond reeds genoeg van die regte mikro-organismes huisves om die voedingstowwe aan plante beskikbaar te stel nie.
Die tegniek wat Sporatec gebruik, kan vir bakterie- en swammonsters gebruik word. Dit is besonder gevoelig en vinnig. Dit word toegepas op molekulêre vlak en kan daarom organismes waarvan kulture ontwikkel kan word en dié waarvan nie kulture ontwikkel kan word nie, identifiseer.
Jacobs en haar studente doen ook ’n plaatontleding (plate assay) om vas te stel of die mikrobes ensieme kan produseer wat belangrike plantvoedingstowwe meer oplosbaar kan maak.
Boere wat hul grond deur Sporatec wil laat ontleed, kan monsters neem en daarheen stuur. Skep grond op ’n diepte van 10 cm en plaas 200 g daarvan in ’n steriele sak en verseël die sak. As monsters van meer as een kamp geneem word, plaas 50 g grond van vier verskillende plekke in verskillende sakke. Herhaal vir elke kamp.
Monsters moet binne 48 uur nadat dit