LABORATORIUMGROEP BREI UIT
Die laboratoriumgroep NviroTek het onlangs ’n meerderheidsaandeel bekom in die Wynland-laboratorium, ’n bekende mikrobiologie-laboratorium op Wellington.
NviroTek, wat deel is van Suidwes Landbou en wat in Hartebeespoort gesetel is, besit nou ’n 80%-aandeel in die Wynland-laboratorium.
Volgens Suidwes is NviroTek nou die onafhanklike landboulaboratorium wat die omvattendste reeks laboratoriumdienste in Suider-Afrika verskaf.
Die gesamentlike besigheid is ook besig om sy aanbod van dienste uit te brei.
Die Wynland-laboratorium is in 1991 gestig en bedien ’n aantal groot voedselen botteleringsaanlegte in die Wes-Kaap met mikrobiese ontledings van kos en drinkwater, asook die chemiese ontleding van drink-, besproeiings- en afvalwater, grond en plantmateriaal.
Die maatskappy monitor ook verskeie produkte om die geskiktheid daarvan vir menslike verbruik vas te stel én toets die higiënestatus van voedselverwerkingsaanlegte. Verder toets hy vir bakterieë in ’n groot verskeidenheid voedselsoorte en wyn.
Suidwes sê in ’n verklaring die Wynlandvir laboratorium het ’n belangrike rol daarin gespeel om talle produkte wat met listeriose besmet was, te identifiseer. Dit het daartoe gelei dat dié produkte betyds aan die WesKaapse mark onttrek kon word.
NviroTek was tot dusver toegespits op die chemiese ontleding van blare, grond, water, kunsmis, kalk, weiding en veevoer. Van sy dienste is om grond te ontleed vir die geskiktheid van bepaalde gewasse en om gewasse se voedingstatus te bepaal deur middel van blaarontledings. Hierdie dienste stel boere in staat om kalk- en kunsmistoedienings te bereken.
Die maatskappy ontleed veevoer ten einde boere te help om optimale rantsoene te formuleer en om die gehalte van grondstowwe te monitor. In dié verband lewer die Wynland-laboratorium ook ’n diens deur onder meer salmonella te monitor, wat veral in die pluimveebedryf probleme veroorsaak.
NviroTek ontleed ook weidinggewasse om te bepaal watter voedselaanvullings die diere benodig.
Die maatskappy doen verskeie soorte ontledings van kunsmis, veral wanneer vervaardigers ’n nuwe kunsmisproduk wil registreer. Terselfdertyd verseker die maatskappy dat kunsmisprodukte aan sekere standaarde voldoen.
Me. Dailena Pienaar, uitvoerende hoof van NviroTek, sê sulke toetse is veral voordelig die verbruiker wanneer moontlike dispute oor die gehalte van die eindproduk ontstaan.
Albei maatskappye bepaal watergehalte vir besproeiingsdoeleindes en vir gebruik deur mense en diere, en bedien verskeie uitvoerders wat aan internasionale standaarde moet voldoen.
Dailena sê die groep het onlangs die lisensie bekom om twee nuwe soorte tegnologie in Suid-Afrika te gebruik.
Een daarvan maak dit vir die maatskappy moontlik om baie vroeg in ’n plant se lewensiklus ’n aanduiding te kry van moontlike voedingstekorte. “Ons kan nou die stikstofstatus in grond betroubaar bepaal sodat boere stikstofvlakke in die grond meer ekonomies bestuur. Daardeur kan vermorsing, asook die besoedeling van water, verminder word,” sê sy.
Met ander tegnologie sal die maatskappy binnekort vir die teenwoordigheid van residu van landbouchemikalieë op vars produkte kan toets. Met dieselfde tegnologie kan die maatskappy ook moontlike residue van groeistimulante en medikasie in vleisprodukte identifiseer.
Die NviroTek-groep en die Wynlandlaboratorium bied ook aan klante ’n koerierdiens wat die betrokke monster so vinnig as moontlik by die laboratorium sal besorg. — JEANNE VAN DER MERWE