NUWE KORTDAGUI HET HOË OPBRENGS
’n Nuwe kortdaguiekultivar wat in Nederland geteel is, stel boere in Suider-Afrika in staat om hoë opbrengste te behaal, wat noodsaaklik is om eenheidskoste te verlaag in ’n landbousektor wat deur baie hoë insetkoste gekenmerk word.
Dr. Quintin Muhl, produkontwikkelingsbestuurder vir groente by Klein Karoo Saadbemarking, sê die onderneming De Groot en Slot in Nederland teel al sedert 1955 uiesaad en het saam met sy vennoot, Bejo Zaden, een van die wêreldleiers in uiesaad geword.
Dit duur 16-18 jaar om ’n nuwe kultivar te ontwikkel. Vanweë groot verskille tussen streke, lande en vastelande word verskillende kultivars vir bepaalde toestande geteel. Klein Karoo Saadbemarking evalueer deurgaans nuwe kultivars in die belangrikste uieproduksiegebiede om vas te stel hoe dit daar aard.
Magarogi het ’n sterk wortelstelsel, wat dit in staat stel om pienkwortel goed te verdra. Die plant het ’n medium- tot dun nek, ’n sterk smaak en ferm, ronde bolle. Dit is ideaal vir die vars mark en geskik vir verbouing in produksiegebiede in die noorde.
Dawie het Maragogi eers twee jaar lank beproef en dit verlede jaar vir die eerste keer kommersieel aangeplant toe dit 10% van sy kommersiële aanplantings uitgemaak het. Vanjaar verhoog hy dit tot 15% omdat hy vertroue in die kultivar gekry het danksy die hoë opbrengs, uitstekende gehalte en hoë ontkiemingspersentasie.