INTERNASIONALE LANDBOUNUUS 3 BRITTANJE | Kopkrappery oor lewendehawe-uitvoer
1 AUSTRALIË | Varkvleis nou ook naspeurbaar
Die Australiese varkvleisbedryf het nou ’n nasionale naspeurbaarheidskema wat funksioneer soos dié vir bees-, skaap- en bokvleis.
Die National Livestock Identification System (NLIS) se varkvleisstelsel staan bekend as die PigPass en gebruik identifikasieplaatjies of tatoeëermerke op die diere se ore om diere te identifiseer. Alle bewegings van varke na plase, veilingsplase, skouterreine en abattoirs word met ’n nasionale handelaarsverklaring (national vendor declaration) op ’n databasis aangedui. Volgens die Australiese regering is daar meer as 1 400 varkplase in dié land, met ’n omset van meer as AUS$1,3 miljard (R12,4 miljard). — Bendigo Advertiser 2 CHINA | Salvo teen Amerika druk mieliepryse hoër
Termynkontrakte vir Chinese mielies het hul hoogste vlak sedert 16 Januarie bereik (1 824 yuan, of R3 469) per ton nadat die Chinese regering ’n ondersoek aangekondig het na die storting van Amerikaanse sorghum, wat baie in dierevoer gebruik word, en onbillike subsidies.
Die aankondiging het die Chinese voerbedryf onkant gevang, want belanghebbendes het nie so ’n ondersoek versoek nie. Handelaars het gereageer en die vraag na plaaslike mielies laat styg, pleks van om die risiko te loop om sorghum by China se grootste buitelandse voorsiener te koop. Amerika het verlede jaar nagenoeg 4,8 miljoen ton sorghum na China uitgevoer en 32,9 miljoen ton sojabone.
Daar is ook ’n moontlikheid dat die Chinese regering mielies uit sy reusagtige mielievoorraad, ’n geraamde 200 miljoen ton (genoeg vir ’n jaar), beskikbaar sal maak. — Reuters
’n Privateledevoorstel deur ’n parlementslid van die Konserwatiewe Party om alle lewendehawe-uitvoer uit Brittanje te verbied, is verlede week teruggetrek te midde van groot verdeeldheid oor of groter dieresorg ten koste van die boerderygemeenskap bevorder moet word.
Mnr. Michael Gove, minister van omgewingsake, oorweeg dit tans om so ’n verbod in te stel. Skotse skaapboere meen egter dié stap sal hul boerderye heeltemal onvolhoubaar maak.
“Daar is geen tariewe op lewende diere nie. Die tariewe op vleis is baie hoog — meer as 40% — en daar is nie ’n manier hoe skaapboerdery hier sal kan voortgaan sonder daardie uitvoermark nie,” sê mnr. Frank Langrish, ’n skaapboer van Sussex.
Mnr. Fergus Ewing, Skotse minister van landelike ekonomiese sake, sê Skotland sal nie aan so ’n skema deelneem nie. — BBC