DEKGEWASSE RAAK KORPORATIEWE VEREISTE
Al hoe meer groot maatskappye vereis van boereverskaffers om ’n aanduiding te gee van hoeveel dekgewasse hulle plant.
Mnr. Steve Groff is ’n boer van die Amerikaanse deelstaat Pennsilvanië en stigter van die firma Cover Crop Solutions. Hy sê sy groot wens vir vanjaar is dat korporatiewe markkragte die groot dryfkrag sal word agter ’n groter aanvaarding van dekgewasse as algemene boerderypraktyk.
“Boere was nog nooit so gereed soos nou om dekgewasse te begin plant nie.”
General Mills, Walmart en Smitfield Foods is almal maatskappye wat reeds volhoubaarheidsplanne gereed het wat dekgewasse, grondgesondheid en verminderde kunsmisverbruik insluit, sê hy.
Die kettingwinkelgroep Whole Foods vereis van sy boereverskaffers om aan te dui in watter mate hulle dekgewasse verbou. Nog ’n voorbeeld is Blue Apron, ’n maatskappy wat stelle vars bestanddele met ’n resep vir ’n ete aan sy kliënte verskaf.
’n Interessante winkelgroep is Wrangler Jeans, wat verlede jaar sy nuwe program met die titel “Tough Jeans, Gentle Footprint” bekend gestel het. Deel daarvan is om katoenboere aan te moedig om dekgewasse te verbou en ander praktyke te beoefen wat grondgesondheid bevorder.
“Elkeen van hierdie korporasies het ’n regstreekse verbintenis met verbruikers wat maklik die dekgewasstorie kan verstaan sodat hulle dit as nuttige bemarkingsmateriaal kan gebruik,” sê Steve.
Hy meen stygende kunsmiskoste, veral van stikstof, behoort ook toenemend dekgewasverbouing aan te moedig. “Boere wat op lang termyn dekgewasse verbou, ondervind deurlopend doeltreffender kunsmisverbruik wat in pas is met ’n goed bestuurde dekgewas.” — MARLEEN SMITH