Van oraloor
NOG ses uitbrekings van die hoogs aansteeklike H5N8-voëlgriepvirus het in Januarie in die WesKaap voorgekom. Die totale aantal uitbrekings wat sedert verlede Junie in Suid-Afrika voorgekom het, het tot 126 gestyg.
Die Noord-Kaap en Limpopo is die enigste provinsies wat nog nie onder die H5N8-virus deurgeloop het nie. Tot en met 23 Januarie was daar 40 uitbrekings onder volstruise, 29 onder wilde voëls, 30 op kommersiële hoenderplase, agt onder agterplaashoenders en 19 onder stokperdjieen dieretuinvoëls.
Die Departement van Landbou, Bosbou en Visserye het hierdie inligting aan die Parlement se portefeuljekomitee vir landbou, bosbou en visserye bekendgemaak. Mnr. Mooketsi Ramasodi, waarnemende direkteur-generaal van die departement, sê omdat Suid-Afrika nie voor verlede jaar se uitbrekings die virus onder hoenders of plaaslike voëls gehad het nie, afgesien van volstruise, word die uitbrekings as baie ernstig vir die land se dieregesondheidstatus gesien.
Me. Rosina Semenya, voorsitter van die portefeuljekomitee, het nie doekies omgedraai om die departement oor die kole te haal oor sy traagheid om biosekerheidskwessies te takel nie.
Sy het gesê sy kan nie verstaan waarom die wetenskaplikes nie dag en nag werk om die virus te bestuur nie. “As ons nie siektes kan bestuur nie, hoe sal ons as ’n land oorleef?”
Graan SA het aan haar gesê hy is gereed om saam te werk sodat daar ’n behoorlike reaksiestrategie ontwikkel kan word vir wanneer uitbrekings van byvoorbeeld die herfskommandowurm die land tref. “Die probleem is die departement beweeg nie vinnig nie. Hy moet ’n regsraamwerk opstel sodat so ’n strategie in werking gestel kan word.”
R40 MILJOEN VIR VERGOEDING
Die kwessie of voëls ingeënt moet word of nie, word steeds met die pluimveebedryf bespreek, het Ramasodi gesê. Inenting teen die virus voorkom nie besmetting nie. Dit verminder slegs die kliniese tekens van die siekte en die verspreiding van die virus, volgens haar.
“Weens die moontlikheid dat inenting die virusbesmetting kan verbloem, sal die meeste handelsvennote nie pluimvee, hoendervleis of produkte van ’n land aanvaar wat teen die virus inent nie.”
Altesaam R40 miljoen is deur die ministeriële begrotingskomitee goedgekeur om boere te vergoeding vir verliese wat gely is. Ramasodi sê die minister het reeds die riglyne goedgekeur vir die vergoeding wat betaal moet word vir gesonde hoenders wat voorkomend uitgeslag moes word. ’n Deel van die geld sal gebruik word om die biosekerheid op pluimveeplase te versterk.
VERBOD OP UITVOER
Talle lande waarheen SuidAfrika pluimveeprodukte uitvoer, het sedert die uitbrekings ’n verbod op die invoer daarvan geplaas.
Die Europese Unie, spesifiek Noorweë, Ysland en Switserland, het op 28 Junie verlede jaar ’n verbod ingestel op die invoer van vleis van loopvoëls, onbehandelde hoendervleis en onverwerkte neweprodukte. Hongkong het in Junie, Julie en Augustus ’n verbod op die invoer van alle pluimveeprodukte ingestel, waaronder eiers.
Israel, Namibië, Mosambiek, die Verenigde Arabiese Emirate, Saoedi-Arabië, Zimbabwe en Swaziland is ook op die lys van lande wat pluimvee-invoer vanaf Suid-Afrika verbied.
Die Wes-Kaapse regering het teen einde verlede jaar aangedui dat boere daar reeds produksieverliese van meer as R800 miljoen weens die uitbrekings van H5N8 gely het.