4 Dié week in die landbou
GROEN EURO’S
Die Land Bank en die European Investment Bank (EIB) het ’n leningsooreenkoms van 50 miljoen euro (R741 miljoen) gesluit waarmee die Land Bank geld aan plaaslike boere kan leen om die invloed van klimaatsverandering teen te werk. Volgens mnr. T.P. Nchocho, uitvoerende hoof van die Land Bank, kan sulke lenings byvoorbeeld gebruik word vir nuwe waterbesparende tegnologie, alternatiewe kragbronne of die bekamping van grondagteruitgang. Die lenings sal vir enige grootte boerdery beskikbaar wees. Dit is die Land Bank se vierde groot lening om sy langtermynlikiditeit te verbeter. (Lees ook bl. 18.)
WANVOORSTELLING
SABC met regstappe indien hy nie dadelik ophou om beelde van beeste en verpakte beesvleisprodukte te gebruik in beriggewing oor die huidige dodelike uitbreking van listeriose nie. Dié beelde is gebruik in SABC-beriggewing oor die onlangse sluiting van Sovereign Foods se Pretoria-abattoir. Die organisasie sê geen listeriosevoorval kon tot dusver met beesvleis verbind word nie en dat sulke wanvoorstellings die bedryf ernstige finansiële skade kan berokken.
EDNA KIES STEENKOOL
Me. Edna Molewa, die Minister van Omgewingsake, het omgewingsgoedkeuring toegestaan vir die ontwikkeling van die Thabametsi-steenkoolkragsentrale, ondanks bevindings van haar eie adviseurs dat die kragsentra- le ’n nadelige impak op klimaatsverandering sal hê. Dié bevindinge is op hul beurt ingesluit in die aansoekproses nadat die Hooggeregshof in Pretoria Molewa se aanvanklike goedkeuring verlede Maart omgekeer het, aangesien dié besluit nie die impak van klimaatsverandering behoorlik oorweeg het nie. Die adviseurs, EOH Coastal and Environmental Services, sê die kragsentrale se “uitlaatgasrisiko’s is baie hoog, waterskaarste-risiko’s is hoog en die hoë vrystelling van kweekhuisgasse as deel van die projek impliseer ’n hoë maatskaplike tol”.
QUANTUM VOL HOOP
Die genoteerde voer-en-hoenderprodusent Quantum Foods verwag dat hy in die oorblywende agt maande van die boekjaar beter gaan vaar as die afgelope vier maande danksy stabiele verdienste in sy voer- en boerderybesighede. Eierpryse per dosyn was die afgelope vier maande 32% hoër as in die ooreenstemmende tyd ’n jaar gelede, en produksiekoste was ook laer danksy ’n daling in voerkoste. Die uitbreking van hoogs aansteeklike voëlgriep het eierverkope met 5,6% laat daal. Voerverkope aan buitepartye het met 1 1 ,7% gestyg, wat vergoed het daarvoor dat die maatskappy nou minder voer aan sy eie sake-eenhede verskaf omdat daar weens voëlgriep minder lêhenne was om te voer.
LISTERIOSE EIS NÓG
Namate ál meer van die 852 pasiënte opgespoor word by wie laboratoriumbevestigde gevalle van listeriose voorgekom het, bly die dodetal styg. Die sterftesyfer staan nou op 107 (30%) van die 355 besmette gevalle wat al geïdentifiseer kon word. Volgens die Nasionale Instituut vir Oordraagbare Siektes (NIOS) kan daar nog nie vasgestel word wat van die oorblywende 497 pasiënte geword het by wie die siekte sedert begin verlede jaar gediagnoseer is nie. Niemand weet ook hoeveel van hulle reeds dood is nie. Tot dusver kon die oorsprong van die bakteriese siekte steeds nie bepaal word nie. Dit is die grootste listerioseepidemie tot dusver ter wêreld en word deur een spesifieke stam van listeriose veroorsaak. Gesondheidsowerhede glo daar is net ’n enkele bron van besmette voedsel wat wyd versprei en verbruik word, of verskeie produkte wat uit een besmette verwerkingsaanleg versprei word.
WURMHULP
Die herfskommandowurm sal na verwagting op ál meer plekke in Suid-Afrika kop uitsteek namate die weer warmer word. Die wurms kom reeds in al vyf distrikte van Limpopo voor, asook in Mpumalanga en in die omgewing van Ncera by Oos-Londen in die Oos-Kaap. Die Amerikaanse hulpagentskap USAid het ’n omvattende gids vir die bestryding van die wurm deur internasionale kundiges bekend gestel. Sonder behoorlike bekampingsmaatreëls reken die agentskap die wurms kan skade van $3,6 miljard (R43,2 miljard) tot $6,2 miljard (R74,4 miljard) in Afrika se 12 grootste mielieproduserende lande aanrig. Die gids, Fall Armyworm in Africa: A Guide for Integrated Pest Management, is gratis aanlyn beskikbaar by bit.ly/2nK6ndr