22 Dis nie ’n bekruiper nie; dis jou winkeltrollie!
WINKELTROLLIES wat jou volg en namens jou in die ry staan, groot digitale skerms met ’n klomp inligting oor die ingevoerde appel waarmee jy in jou hand staan en ’n toonbank waar jy die biefstuk wat jy pas uitgesoek het, na jou smaak kan laat gaarmaak om daar en dan te geniet. Dít is hoe supermarkte kan lyk as aanlynwinkels hul sin kry.
Die opkoms van aanlyn-aankope van kruideniersware – spesifiek vars groente en vrugte – lei tot die “aanlyn-tot-vanlyn-neiging” (online-to-offline). Aanlynwinkels belê ook in nuwe, fisieke supermarkte, wat glad nie soos hul tradisionele eweknieë lyk nie.
’n Goeie voorbeeld is Alibaba, ’n leier in China se e-handelmark, wat die afgelope twee jaar miljarde in winkels van “baksteen-en-sement” belê het. By hierdie supermarkte kan klante nie net inkopies doen nie, maar ook eet, kruideniersware aanlyn van hul slimfone af bestel, hul fone gebruik as skandeerders om produkinligting te kry en met die selfoontoepassing Alipay betaal.
FOON-GENOOT
Aanlyn-aankope is veral gewild in China, wat die grootste kruidenierswaremark ter wêreld het en wat vinniger groei as enige ander mark. Volgens mnr. Wayne Prowse van Fresh Intelligence Consulting, ’n handelsontleder vir die tuinboubedryf, voer China jaarliks 3,77 miljoen ton vars vrugte in. Dit is net ’n breukdeel van die 214 miljoen ton vars produkte wat die land self produseer.
’n Groot deel van China se ingevoerde sitrus kom uit SuidAfrika, het Prowse op die Fruitnet World of Fresh Ideaskonferensie in Berlyn gesê. Dit is aangebied net ’n dag voor die toonaangewende Fruit Logistica, ’n handelskou vir vars produkte, in dieselfde stad begin het.
Mnr. Chris White is die besturende direkteur van Fruitnet Media International, die wêreld se voorste uitgewer en geleentheidsorganiseerder vir wêreldwye vrugte-en-groentebesighede. Hy sê hy het verlede jaar ’n paar maande in Sjanghai gewoon. Hy moes gou leer dat sy slimfoon te alle tye by hom moet wees omdat hy dit vir allerlei dinge in China kon gebruik.
GOEIE BELEWENIS
Mnr. Yuxin Yang van die tydskrif Asiafruit sê aanlynwinkels sien hul fisieke winkels byna as belewenissentrums.
“Jy kan dieselfde produk as in jou aanlynwinkel teen dieselfde prys sien, maar dit kombineer die beste wat die aanlynmodus kan bied met die beste wat dit van lyn af kan bied. Jy kan byvoorbeeld aanlyn betaal, pleks van om kontant daarvoor te gebruik. Die winkels het dikwels ook ’n volledige voedseldiens, wat beteken jy kan jou biefstuk daar koop, laat voorberei en geniet. Dit gaan oor waardetoevoeging en tegnologie.”
Die winkels gebruik tegnologie, groot data en kunsmatige intelligensie om klantediens te verbeter en nuwe ervarings te verskaf wat konvensionele supermarkte nie doen nie.
“Daar is byvoorbeeld groot skerms by elke produk met inligting oor waar dit vandaan kom, watter kultivar dit is, wat die suikerinhoud daarvan is en so meer. Die inligting is ook met jou slimfoon beskikbaar.”
GERIEF, GERIEF, GERIEF
Nog ’n nuutjie is die slimtrollie. As jy die trollie vat, skandeer jy dit met jou selfoontoepassing. Soos jy deur die winkelrye stap, volg jou trollie jou terwyl jy na hartelus jou inkopies inpak. Jy kan dan die trollie na die kasregister stuur om vir jou aankope te betaal. Terwyl jy die ry vryspring, kan jy nog deur die winkel stap of ’n koppie koffie in die winkel geniet.
Nog ’n neiging van aanlynwinkels is om munt te slaan uit mense se behoefte aan gerief.
“Die idee is om die winkel so na as moontlik aan verbruikers te bring, hetsy deur winkelrakke in kantore of by die trappe in woonstelgeboue beskikbaar te stel. Daar is reeds 20 000 sulke rakke in 10 Chinese stede. Dit werk amper soos ’n muntoutomaat, maar jy gebruik ’n selfoontoepassing om daarvoor te betaal, nie kontant nie,” sê Yang.
Volgens hom werk die winkels dikwels ook saam met tradisionele supermarkte, wat beteken kleinhandel in sy geheel word bevorder.
“Ons moet net besef alles is nog baie nuut en daar is baie eksperimente. Sommige gaan werk, ander gaan misluk. Maar ons kan ons gereed maak vir groot beleggings in die sektor omdat vars kos mense herhaaldelik terugbring winkels toe.”
BOORDBESOEKERS
“Verwag om mense van Alibaba en dies meer in jou boorde te sien, want almal soek voortdurend na die volgende groot ‘vonds’. Hulle ding mee met mekaar en met tradisionele kleinhandelaars en soek alewig na nisprodukte om te bemark en te versprei. Dikwels sal hulle ook eksklusiewe regte vir dié produkte versoek. Verskaffers en boere moet dus seker maak hul produkte is uniek sodat dit kan uitstaan tussen al die ander produkte,” was Yang se raad aan produsente.
‘Verwag om mense van Alibaba en dies meer in jou boorde te sien, want almal soek voortdurend na die volgende groot ‘vonds’.’