Laat die natuur vir jou geld maak
’n Volhoubaarheidsplan vir saaiboere is nodiger as ooit tevore. Landbouweekblad se konferensie oor bewaringslandbou het dalk net die oplossing waarna boere soek om nog dekades lank winsgewend te boer.
Herlewingslandbou is ’n omvattende praktyk wat veral daarop klem lê om die grondbiologie te herstel. Een van die tegnieke wat daarvoor gebruik word, is die aanplanting van dekgewasse en om lewende wortels die hele jaar lank in die grond te hou. Nog ’n aspek is die gebruik van vee as deel van ’n volhoubaarheidstrategie vir saaiboere.
KONFERENSIE
Landbouweekblad
hou op 19 en 20 Maart sy konferensie oor herlewingslandbou in vennootskap met die Reitz Riemland-studiegroep, Graan SA, VKB, Standard Bank en Monsanto.
Volhoubaarheid in die landbou rus op ’n paar pilare. Kennis, vernuwende denke, nuwe tegnologie en verbeterde tegnieke, hoër produktiwiteit en meer wins per hektaar is maar enkele daarvan. Die beskikbaarheid van natuurlike hulpbronne in die toekoms is waarskynlik die belangrikste aspek. Sonder gesonde grond en genoeg water is die volhoubaarheid van boerdery in sy huidige formaat op ’n afwaartse trajek.
Hoe kan boere hul boerderye aanpas om die agteruitgang van grond en onvoorspelbare weerpatrone die hoof te bied?
’n Paneel kundiges sal oor verskeie aspekte van herlewingslandbou gesels. Só word die belangrikheid van “natuurlike dienste” byvoorbeeld in meer besonderhede bespreek.
Die hoofspreker is mnr. Jay Fuhrer, ’n Amerikaner en wêreldbekende kenner van herlewingslandbou. Hy gesels oor die gebruik van dekgewasse en die integrasie van vee om grondgesondheid tot op die hoogste vlak te voer.
Mnr. Johann Zietsman, wat al wêreldwyd gekonsulteer het oor weiding, sal wys hoe jy jou weiveld se drakrag kan verdriedubbel én jou grond kan opbou.
Die wêreldbekende skrywer en kenner mnr. Roland Bunch sal konferensiegangers inlig oor hoe om produktiwiteit natuurlik te ontsluit.
Prof. Francois Engelbrecht van die Wetenskaplike en Nywerheidsnavorsingsraad (WNNR) gesels oor die weer en wat jy oor die volgende 10, 50 en 100 jaar kan verwag.
Die moontlike gevolge op die landbou van dié langtermynvooruitsigte word bespreek.
BESOEK VELDPROEWE
Sien is inderdaad glo. Geen konferensie oor herlewingslandbou is sy sout werd sonder ’n besoek aan die enjinkamer nie.
Kom kyk self hoe dekgewasse vir mnr. Danie Slabbert, voormalige voorsitter van die Riemland-studiegroep, op sy plaas diens doen in die proewe wat hy aangeplant het.
Verskillende saadmengsels, bewerkingsmetodes en hoe ultrahoëdrukbeweiding werk, sal op die plaas te sien wees.
PLAASLIKE KENNERS
Ander Suid-Afrikaanse kenners wat hul ervaring, kennis en navorsing gaan bespreek, kyk na onderwerpe, soos nuttige insekte, struikelblokke en suksesse, asook die ekonomiese voordele van herlewingslandbou vir die boer.
Leer byvoorbeeld meer oor geïntegreerde insekbestuur van prof. Johnnie van den Berg van die Noordwes-Universiteit.
Een van die land se kundiges op die gebied van bewaringslandbou is dr. Hendrik Smith van Graan SA. Hy gaan praat oor die probleme en vordering wat Suid-Afrika beleef rakende bewaringsbewerking.
Dr. Charlene Janion-Scheepers gaan die ekonomie van natuurlike dienste en gesonde grond bespreek.
BOERE GESELS SAAM
Landbouweekblad wil ook van sy lesers weet wat hul belewing van en vrae oor bewaringslandbou is. ’n Boerepaneel met van Suid-Afrika se voorste boere gaan praat oor hoe hulle die natuur gebruik om vír hulle te werk, maar ook oor die lesse wat hulle geleer het en hoe ander boere daarby kan baat vind.
Die boerepaneel bestaan uit mnre. Egon Zünkel (bewaringslandbou in KwaZulu-Natal), Dirk Lesch (bewaringslandbou in die Swartland), Bertie Coetzee (bewaringslandbou in die Noord-Kaap in ’n gemengde organiese boerdery), Izak Dreyer (hoëdigtheidsbeweiding geïntegreer met akkerbou in die Vrystaat), Gerrit van Zyl (ekstensiewe hoëdigtheidsbeweiding), Hannes Otto (bewaringslandbou in Noordwes) en André Lund (ultrahoëdruk-strookbeweiding in die Karoo).
LESERSNAVORSING
Met die droogte, stygende insetkoste en onsekerheid oor die toekoms wat die volhoubaarheid van talle plase bedreig, is ’n konferensie rondom die beginsels van herlewingslandbou ’n natuurlike keuse. Met Landbouweekblad se onlangse navorsing oor mediagebruik onder kommersiële boere is die noodsaaklikheid van ’n konferensie soos hierdie vir die versekering van ’n volhoubare landbousektor, verder benadruk.
Die navorsing is deur Marketing Surveys and Statistical Analysis behartig. Kommersiële boere in al die provinsies is ’n reeks vrae gevra oor hul boerderye en mediagewoontes.
Die navorsing wys dat sake wat boere die meeste bekommer, wentel rondom arbeidskoste, insetkoste en die klimaat/droogte. Die gedrukte media, soos
Landbouweekblad, word beskou as ’n belangrike en betroubare bron van inligting, terwyl geleenthede om bedryfsinligting te bekom boaan die lys staan vir “nuttige bronne van landbouinligting”.
Sowat 85% van alle respondentehetgesêboeredaeenkonferensies is vir hulle van groot waarde. Uit die groep respondente wat ’n omset van meer as R10 miljoen per jaar behaal, was dié syfer bykans 95%. Dié groep
hoë-omsetboere behels net meer as 20% van die respondente.
Landbouweekblad het met die Reitz Riemland-studiegroep hande gevat vanweë die groep se vordering met proewe en daadwerklike bewyse dat selfs dié deel van die land kan baat vind by herlewingslandbou. Die sentrale ligging in die Vrystaat is ’n verdere pluspunt vir boere in die somersaaigebiede.
Die lesersnavorsing benadruk ook hoe belangrik graanverbouing is vir die Suid-Afrikaanse landbou. Die grootste persentasie boere (sowat 35%) uit die hoë-omsetboeregroep se primêre boerderybelang lê in somergrane.
Wie anders moet nog die konferensie bywoon? Volgens die lesersnavorsing is 70% van die respondente se opvolgstrategie geskoei op die oorname van die boerdery deur ’n seun of dogter of regstreekse familielid. Die volgende geslag behoort dus ook dié konferensie by te woon.
■ Sien bl. 30-31 vir nog inligting.