Nuwe naam, nuwe begin
AgChem se reeks landbouchemiese produkte, waarop boere al 20 jaar staatmaak, trek nou ’n nuwe baadjie aan. Landbouweekblad was by die bekendstelling van die nuwe Rolfes Agri-handelsnaam.
Geen onderneming of boerdery kan volhoubaar wees sonder aanpassing en vernuwing nie. Gevolglik het die landbouchemiese vervaardiger AgChem die nuwe jaar begin met ’n nuwe naam én nuwe verpakking vir sy produkte. Dit is nou bekend as Rolfes Agri.
Die maatskappy spits hom toe op die ontwikkeling van reekse produkte wat by verskillende boerderypraktyke inpas. Heel gepas is die maatskappy se leuse formulating sustainable growth.
“Ons vervaardig al geruime tyd nie meer nét landbouchemikalieë nie, maar ook produkte wat aan die sogenoemde ‘biologiese’ en ‘organiese’ beskrywing voldoen,” het mnr. Gerrit Badenhorst, besturende direkteur, tydens Rolfes Agri se bekendstelling gesê.
Die maatskappy se mikpunt is om gewasproduksie met ’n volhoubaarheidsvisie moontlik te maak. Daarom kyk Rolfes Agri se span gereeld na die ontwikkeling van nuwe, doeltreffende produkte wat ook by die natuur kan inskakel.
Staatmakerprodukte, soos Moer-Tu Super, K-Sil, Muscle-up, Power-Up en Ecklomax, is steeds deel van die aanbod, maar met splinternuwe verpakking.
“Verbruikers sal dadelik kan sien watter produkte van Rolfes Agri is en watter nie. Ons verpakking is nou baie eenvormiger en pas mooi in by ons visie van ’n nuwe era by die maatskappy.”
Boere wat weet van klein be- gin en harde werk om sukses te behaal, sal aanklank vind by AgChem en Rolfes Agri se verhaal.
Die maatskappy het in 1998 met net ’n paar tenks chemikalieë begin. Die vervaardiging en produkontwikkeling het gou gegroei totdat die maatskappy se vervaardigingsaanleg in Waltloo, Pretoria, nou tot 1,2 miljoen liter (of kilogram) se produkte per maand vervaardig, verpak en verskeep.
Die gebruik van tegnologie en ’n belegging in opleiding en kundige personeel het bygedra tot die groei van AgChem en sy reeks produkte.
Rolfes – ’n maatskappy wat op die JSE genoteer is – het die waarde en gehalte van AgChem se spesialisprodukte raakgesien en in 2013 ’n 70%-aandeel in die maatskappy bekom. In 2015 het Rolfes die oorblywende 30%-aandeel bekom.
Met die ondersteuning en kundigheidsnetwerk van die Rolfes-groep kan die maatskappy makliker nuwe formulasies ontwikkel of bestaande reekse produkte verbeter. Die maatskappy besit 278 plaaslike produkregistrasies en 70 internasionale registrasies, wat wissel van slakdoder tot voedingsprodukte.
Rolfes Agri vervaardig onder meer produkte vir gebruik by mielies en sojabone.
Groente- en vrugteboere word ook nie afgeskeep nie en middels vir gewasbeskerming by uie, aartappels, avokado’s, mango’s, druiwe, sitrus, neute en steenvrugte is ook beskikbaar.
Danksy die samewerking met plaaslike verspreiders, soos BayAgro, Inteligro, Nexus, Farmers Agri-Care en Laeveld Agrochem, kan Rolfes Agri landwyd produkte lewer. Die maatskappy het ook ’n nuwe selfoontoepassing, Facebook-blad en webwerf geskep.