Lasagnevelle
Gebruik ’n koekroller of ’n pastamasjien en rol die pastadeeg so dun as moontlik en egalig uit. Sny die uitgerolde pasta in ewe groot stukke. Laat dit vir ’n paar minute effens droog word op ’n meelbestrooide oppervlak voor die pasta vir lasagne gebruik word.
Lasagne met spek, sampioene en spinasie
Dié is een van die lekkerste kombinasies vir ’n gebakte pasta. Rokerige varkspek en romerige spinasie is perfekte pas(ta)maats.
1 pak (250 g) spekvleis, fyn gesnipper 30 ml botter 1 ui, fyn gekap 1 knoffelhuisie, fyn gekap 250 g gesnipperde sampioene, fyn gekap Sout en vars gemaalde swartpeper na smaak 750 ml geroomde spinasie 1 blik (410 g) tamatiepuree of gekapte tamaties 12 vars lasagnevelle (van ongeveer 15 x 10 cm elk) 100 ml room 180 ml gerasperde cheddarkaas 100 ml gekrummelde fetakaas Gekapte, vars pietersielie
Voorverhit die oond tot 180 °C. Braai die spekvleis in ’n groot pan tot halfgaar. Voeg die botter, ui en knoffel by en braai verder tot die ui sag is. Voeg die fyngekapte sampioene by en braai tot gaar. Geur met sout en peper. Voeg die geroomde spinasie by, verhit tot kookpunt en prut vir ’n paar minute tot geurig.
Skep ’n paar lepels tamatiepuree in ’n oondbak en smeer dit egalig oor die basis van die bak. Pak drie lasagnevelle langs mekaar in die bak. Skep ’n lagie van die spek-en-spinasiemengsel bo-op en bedek met ’n laag lasagnevelle. Smeer weer ’n lagie tamatiepuree bo-op, gevolg deur nog ’n laag spek-en-spinasie en lasagnevelle. Herhaal die proses nog een keer en eindig met ’n laag lasagnevelle. Drup die room egalig oor die bokant van die pasta en sprinkel die kaas oor.
Bak die lasagne vir 30-40 minute, tot goudbruin en deurgaar. Sprinkel die pietersielie oor net voor jy dit voorsit. Lewer 9 groot porsies.