DIE ANDER SÊ

DIE Suid-Afrikaanse Inkomstediens (SAID) dreig talle belastingbetalers met regstappe weens agterstallige betalings, ofskoon baie van dié mense beswaar aangeteken het teen hul aanvanklike aanslag en daarmee saam ook aansoek gedoen het om uitstel van die betaling totdat die dispute besleg is.

Mnr. Sicelo Mkosi, waarnemende woordvoerder van die SAID, sê die SAID doen nie skuldinvorderingstappe tot tien dae nadat die SAID die belastingbetaler in kennis gestel het van die uitslag van die versoek om uitstel nie.

Belastingpraktisyns sê egter die SAID hou nie by die voorgeskrewe sperdatum van 60 dae vir reaksie op besware nie. Dit blyk dat die versoeke om uitstel nie op die SAID se stelsel weerspieël word nie – nie eens nadat uitstel toegestaan is nie. Buiten dat belasting dus onbehoorlik ingevorder word, word boetes vir onderbetaling óók gehef waar die stelsel nie die uitstel aandui nie. Aansoeke om belastingklaringsertifikate kan ook op grond van sulke uitstaande betalings afgekeur word.

Mnr. Eric Mkhawane, uitvoerende hoof van die belasting-ombud, sê vertragings met die finalisering van besware en appèlle, asook wederregtelike stappe deur die SAID om skuld in te vorder, is geïdentifiseer as sistemiese kwessies. Dit beteken belastingbetalers hoef nie die SAID se interne geskilbeslegtingsmeganismes te volg voordat hulle klagte by die ombud aanhangig maak nie. Hy raai diegene met sulke probleme om formele klagte by sy kantoor aanhangig te maak.