‘FOUT’ SNY PLASE AF VAN BUITEWÊRELD
AGRI SA het verlede week dringende samesprekings met Telkom en een van sy diensverskaffers, Open Serve, belê nadat talle boere in die Noord-, Oos- en Wes-Kaap se telefoonlyne die afgelope paar weke afgesny is.
Talle boere in dié streke het kennisgewings ontvang dat Telkom hul landlyndienste gaan opskort. Volgens mnr. Henk van Wyk, voorsitter van Agri Noord-Kaap, is sowat 70 boere van Garies se landlyne vroeg verlede week afgesny sonder dat hulle enige kennisgewing ontvang het.
Dr. Requier Wait, hoof van ekonomie en handel by Agri SA, sê volgens Open Serve het ’n fout op die stelsel daartoe gelei dat dié landlyne afgesny is. Die fout is reggestel.
Van Wyk en mnr. Doug Stern, voorsitter van Agri Oos-Kaap, sê talle boere in hul provinsies, asook boere in die Wes-Kaap, het al kennisgewings ontvang dat dié dienste opgeskort gaan word. Sommige boere in die Oos-Kaap se landlyne is ook al afgesny, maar ná ingryping deur Agri Oos-Kaap is dit weer aangeskakel.
RISIKO
“Dit is ’n veiligheidsrisiko, veral met swak selfoonseine,” sê Stern.
“Hoe moet jy kommunikeer tydens ’n krisis as jou diens sonder kennisgewing afgesny word of sonder dat ’n alternatief bestaan?”
Die alternatiewe diens wat aan dié boere gebied word, is toegang tot ’n lyn op ’n telefoon met ’n selfoonsimkaart teen dieselfde koste as die landlyn. Die gebruikers moet egter ’n goeie MTN- of Telkom-selfoonsein hê.
Boere by Murraysburg in die Wes-Kaap sê redes wat aan hulle gegee is vir die opskorting van die dienste maak nie vir hulle sin nie.
Mnr. Kotie van den Berg van die plaas Beeldhouersfontein sê die alternatiewe diens is weens die gebrek aan ’n selfoonsein nie vir alle boere werkbaar nie.
“Ek skat by Murraysburg het slegs die helfte van die plase ’n behoorlike selfoonsein.”
EIE GENADE
Van den Berg sê boere is aan hul eie genade oorgelaat as hulle nie geld wil bestee aan ’n satellietfoon of nie ’n sterk genoeg selfoonsein het nie.
“Dit is asof Telkom sy skouers optrek en nie moeite wil doen om jou te help nie. Ons wil ons interneten telefoonlyne op verskillende lyne hê sodat ons alternatiewe het as die een foutief is. Die infastruktuur wat ons tans vir internetdienste gebruik, is uiters kwesbaar vir weerlig en uiterste weerstoestande.”
Hy sê kommunikasie vanaf Telkom is swak. Klagtes word nie beantwoord nie. Party boere kry kennisgewings, terwyl ander geen kommunikasie ontvang nie.
Mnr. Cecil Uys van Heidelberg in die Wes-Kaap sê in dele van dié gebied is lyne verlede jaar al opgerol, terwyl talle boere al maande wag op die satellietfone wat glo geïnstalleer sou word om die landlyne te vervang.
Wait sê Agri SA het boere se griewe aan Telkom en Open Serve oorgedra en gesprekke duur voort. Hy versoek boere met soortgelyke probleme om dit by hul plaaslike boerevereniging aan te meld sodat dit na Agri SA verwys kan word. Agri SA ondersoek ook ander opsies vir boere.
‘Dit is asof Telkom sy skouers optrek en nie moeite wil doen om jou te help nie.’