NUUTSTE NAVORSING OOR BONTEBOKKE BESPREEK

BONTEBOKBOERE het op die eerste Aldam-wildskool die geleentheid om op die hoogte te kom van die heel nuutste navorsing oor dié gesogte diersoort. Dit sal ’n werksessie deur mnr. Deon Furstenburg wees, wat aan die voorpunt staan van navorsing oor dié gesogte bokke.

Volgens mnr. Francoaise Schutte, eienaar van die Mbogo-wildboerdery by Theunissen en mede-aanbieder van die wildskool, het Furstenburg, ’n bioloog, konsultant en direkteur van Geo Wild Consult, in 2016 ’n omvattende studie oor die bontebok-vraagstuk onderneem. Dit is op aandrang van Wildbedryf Suid-Afrika se bontebokadvieskomitee gedoen. Hy sal van sy resultate daar bespreek.

Furstenburg het in sy studie die toeëiening van die Wes-Kaapse renosterveldhabitat as die oorsprong en natuurlike habitat van die bontebok in twyfel getrek. Volgens wetenskaplike aanduidings het die bontebok waarskynlik nie in die huidige, bedreigde renosterveld ontstaan nie, maar eerder taamlik onlangs (sowat 6 000 jaar gelede) daar vasgevang geraak.

Die studie het ’n holistiese, interdissiplinêre benadering gevolg waarvolgens spesifiek na die dinamika van geografiese landvorming en seevlakke gekyk is.

HUIWERIG

Furstenburg sê die owerhede het egter baie teësinnig aan dié bevinding gebyt. ’n Werksessie is in November 2016 in Kaapstad saam met Sanparke gehou om ’n nasionale bontebok-biodiversiteitsbestuursplan te finaliseer. Die advieskomitee is egter nie die geleentheid gegun om wetenskaplike bydraes te lewer nie. Verdere verwikkelinge op owerheidsvlak was eweneens onbevredigend vir bonteboktelers.

Wildboere wat met hierdie wildsoort teel, kry die kans om tydens die vergadering op 14 Maart op die hoogte van die jongste verwikkelinge te kom.

NAVRAE: Me. Charmaine Alberts, e-pos: palberts@telkomsa.net of tel. 051 821 1783.