WOLBOERE STEM VIR HOËR BEDRYFSBYDRAE
WOLBOERE in KwaZulu-Natal het op vyf streekvergaderings van die Nasionale Wolkwekersvereniging (NWKV) eenparig hul toestemming vir verhoogde bedryfsbydraes gegee.
Ekstra geld is nodig om bedryfsontwikkeling voort te sit en wolboerdery op ’n volhoubare vlak te hou.
Mnr. Herman Hugo, mede-ondervoorsitter van die NWKV, het op ’n gesamentlike streeksvergadering van die NWKV en die Rooivleisprodusente-organisasie (RPO) op Dundee gesê finansiering van buite is aan die daal. Dit is dus moeilik om die huidige dienste aan wolboere op lang termyn vol te hou. Die wolbedryf moet dus méér selfvoorsienend word.
Boere op die streekvergaderings op Lüneburg, Dundee, Estcourt, Underberg en Cedarville het eenparig hul toestemming gegee dat die nasionale NWKV-kongres versoek word om die bedryfsbydraes met sewe sent per kilogram wol wat verkoop word, te verhoog. Dit sal die totale bydrae op 22 sent per kilogram te staan bring.
GEHALTE
Die oogmerk is dat die Suid-Afrikaanse Wol- en Sybokhaarkopersvereniging (Sawamba) al in Augustus sal begin om die ekstra geld by verkope af te trek.
Die huidige vyftien sent per kilogram is hoofsaaklik vir die internasionale bevordering van wol. Die bykomende sewe sent sal ongeveer R3,5 miljoen per jaar inbring, gegrond op wolverkope van 50 miljoen kilogram per jaar. Die doel is juis om skeerderopleiding, die monitor van roofdiere en kommunikasie met lede van die NWKV te finansier.
Hugo het aan Landbouweekblad gesê die ander wolstreke se toestemming gaan ook op streeksvergaderings gevra word, aangesien die oogmerk is om die verhoogde aftrekkings voor die nasionale NWKV-kongres te laat begin. Dit sal nie vir ’n onbepaalde tydperk geld nie, maar net vir drie of vier jaar, waarna dit hersien kan word.
‘Die bykomende sewe sent sal ongeveer R3,5 miljoen per jaar inbring.’