‘BUURPLASE’ SMELT SAAM

OVERBERG AgrienAcornAgriis soos twee buurplase wat die grensdraad tussen hulle wil afbreek en saam groter wil boer.

Só sê mnr. André Uys, groepbesturende direkteur van Overberg Agri, oor die voorgenome samesmelting met die Somerset-Wesse beleggingsmaatskappy wat fokus op landbou.

Die resultaat sal ’n nuwe maatskappy wees met ’n geïntegreerde vermoë om waarde toe te voeg in die landbou- en voedselsektor. Die maatskappy sal hom toespits op beleggings in en die ontsluiting van nisgeleenthede in die sekondêre landbou- en voed-

selwaardeketting in Suider-Afrika, luidens ’n verklaring. Dit sal ook meer gediversifiseer wees tussen gewasse, inkomstebronne en geografiese gebiede.

Uys sê Overberg Agri en Acorn Agri werk nou al “geruime tyd” saam. Acorn Agri besit reeds ’n belang van 25,6% in Overberg. Die grootste deel daarvan is in 2014 bekom. “Die samesmelting is in wese die volgende stap, soos waar twee buurplase die grensdraad tussen hulle verwyder om saam groter te boer.”

Mnr. Pierre Malan, hoof- uitvoerende beampte van Acorn Agri, sê daar bestaan sterk sinergieë tussen die twee maatskappye. “Ons deel dieselfde waardes.”

STRAKS GENOTEER

In ’n omsendbrief aan aandeelhouers

word glo genoem dat die nuwe onderneming op die JSE Bpk. genoteer kan word.

Dr. Kobus Laubscher, landbou-ekonoom en voorsitter van FarmVision, sê die samesmelting maak die landbou oop vir beleggings van buite.

“Die basis van die maatskappy behoort by die landbouers te bly, maar dit sal ook die verhandeling van aandele op ’n mededingende grondslag moontlik maak. Dit kan ruimte vir beleggings in die landbou skep.”

WERKSKEPPING

Hy meen die nuwe entiteit kan sekerheid gee aan bestaande werkgeleenthede, maar ook nuwe geleenthede skep.

“En dit op die regte plek – weg van die plaas. Dit gaan stabiliteit bring in die landelike omgewing wat hulle bedien. As hulle uiteindelik noteer, is daar boonop toegang tot kapitaal buite die landbou wat hierdie belegging kan ondersteun.” Hy beskou die samesmelting as ’n strategie om albei ondernemings se teenwoordigheid te vergroot.

“Dit gee diepgang ten opsigte van diversifisering en blootstelling aan risiko. Dit bied meer omvattende dienslewering, veral aan lede wat ook in daardie rigting wil beweeg. Die mandjie van insette, kundigheid en netwerke is van onskatbare belang. Dit gaan die grondslag skep vir ’n interessante omgewing en kan strategiese sinergieë bevorder en ook baie vir die streek beteken ten opsigte van volhoubaarheid.”