RCL SPAAR MILJOENE MET SON EN AFVALWATER
RCL FOODS is onder die 22% topmaatskappye in Suid-Afrika wat deel is van ’n projek waarin maatskappye hul koolstofspoor bekend maak.
Die maatskappy het ’n A minus-gradering in verlede jaar se koolfstofbekendmakingsprojek (CDP) behaal, wat hom ook onder die 18% topmaatskappye in Suid-Afrika in die sektor vir verbruikerstapelvoedsel plaas.
RCL sê in ’n verklaring een van die groot prestasies in die vermindering van sy koolstofvrystellings is die bou van sy Waste-to-Value-aanleg naby Worcester. By dié aanleg word hernubare energie uit afvalwater van die groep se hoenderverwerkingsaanleg opgewek.
Die aanleg is die grootste in sy soort in Afrika. In drie maande is meer as 926 673 kWh hernubare energie daar opgewek, wat 35% van die totale krag is wat die terrein by Worcester benodig.
In ’n ander projek wek 271 sonpanele by die maatskappy se nasionale kantoor 200 000 kWh per jaar op, wat genoeg energie is vir al die ligte in die gebou.
DROOGTE
Mnr. Ettienne Thiebaut, hoof van volhoubaarheid by RCL, sê waterbesparing is ook ’n voorrangsaak vir die maatskappy.
“Ons ontwikkel nog ons planne ten opsigte van water, maar die droogte was ’n bykomende katalisator in ons heroorweging van watergebruik in ons suikersake-eenheid.
“Die doeltreffender besproeiingstegnieke wat ons in dele van ons suikerrietkweekbedrywighede begin gebruik het, het reeds waterbesparings begin oplewer. Ons sal voortgaan om ’n meer droogteweerstandige onderneming te skep,” sê Thiebaut.
Die CDP is in 2000 in werking gestel. Verlede jaar het ongeveer 3 000 maatskappye wêreldwyd inligting oor klimaatsverandering, water en ontbossing bekend gemaak.
Na verwagting sal die druk op Suid-Afrikaanse maatskappye toeneem om hul koolstofvrystellings op ’n wêreldwye platform te bestuur, te monitor en bekend te maak, sê RCL.