Veediefstal styg met 8,8% in 2016-’17

DIE polisie het die nasionale veediefstalstatistiek vir 2016-’17 verlede Oktober bekend gemaak. Dié syfers is deur die nasionale veediefstalvoorkomingsforum ontleed. Daarvolgens blyk dit dat veediefstal in 2016-’17 landwyd met 8,8% teenoor die vorige ooreenstemmende tydperk toegeneem het.

Mnr. Willie Clack, voorsitter van die forum, sê die styging kan dalk onrusbarend wees, maar dit kan wees weens ’n ware styging in veediefstal óf omdat slagoffers meer sake aanmeld.

Die meeste veediefstal het in Noordwes en Mpumalanga voorgekom, met 22,5% van alle sake wat in elk van dié provinsies aangemeld is. In Gauteng is 20,7% van sake aangemeld.

Polisiekantore wat ’n styging van meer as 50% in veediefstalsake ondervind het, was KwaMhlanga (171%) in Mpumalanga, Phokeng (149%) in Noordwes, Ermelo (108%) in Mpumalanga, Selosesha in die Vrystaat en Belfast in Mpumalanga (albei met 78%), Nongoma (73%) in KwaZulu-Natal en Matla- la (57%) in Limpopo.

Brandpunte waar daar meer as 150 gevalle van veediefstal in 2016-’17 aangemeld is, was veral in die Oos-Kaap, naamlik by Sulenkama (231 gevalle), Bityi (214), Qumbu (205), Maluti (185) en Mthatha (179). In die Vrystaat is die meeste gevalle by Harrismith (175) aangemeld, in Mpumalanga by KwaMhlanga (160) en in KwaZulu-Natal by Bergville (158).

Die TABEL toon die ekonomiese impak van veediefstal in Suid-Afrika vanaf 2011 tot 2017. In die boekjaar wat verlede jaar geëindig het, het boere verliese van R734 miljoen gely.