RPO POSISIONEER HOMSELF VIR TOEKOMS
DIE Rooivleisprodusente-organisasie (RPO) se strategiese beplanningsessie is vroeg vanjaar in Bloemfontein gehou. Mnr. Koos van der Ryst, voorsitter, het gesê wisselvallige marktoestande en dieregesondheid is van die belangrikste knelpunte in die volhoubaarheid van die bedryf.
“Toegewyde aandag moet ook daaraan gegee word om toetreders tot die rooivleisbedryf te bemagtig met die nodige opleiding en ondersteuning ten einde produksie volhoubaar en mededingend te maak,” het hy gesê.
Volgens mnr. Gerhard Schutte, hoofbestuurder, het die RPO homself op die werksessie geposisioneer om die belange van die produsent te verteenwoordig sodat voedselsekerheid in Suid-Afrika bevorder kan word.
Die RPO se uitvoerende raad en belanghebbendes het die kernrol van die RPO in die toekoms bespreek, asook volhoubaarheid in die totale rooivleiswaardeketting.
Van der Ryst het gesê die RPO is gereed om die mededingendheid en volhoubaarheid van die rooivleisbedryf te help verseker.
Geleenthede vir die uitbreiding van die RPO se funksies, ondersteuning van die rooivleisbedryf en waarde-ontsluiting vir produsente is in Bloemfontein geïdentifiseer. Die volgens sake is ook bespreek: Bestendige marktoegang en bemarkingsgeleenthede vir produsente se produk. Die bou van strategiese vennootskappe en verhoudings. Inklusiwiteit en transformasie van die rooivleisbedryf. Vroegtydige bestuur van dieregesondheid en die uitbreiding van funksies, soos navorsing en ontwikkeling, produksie-ontwikkeling, opleiding en tegnologie-oordrag. Volgens Schutte is dit noodsaaklik om biosekerheidsrisiko’s, soos dieregesondheid (insluitend naspeurbaarheid), vroegtydig te takel ten einde produksie van topgehalte te bevorder. Die RPO sal dié taak saam met die nasionale organisasie vir opkomende rooivleisprodusente (Nerpo) bestuur. Geld uit die nuwe statutêre heffing sal daarvoor gebruik word. In vennootskap met die nasionale dieregesondheidsforum sal klem daarop geplaas word.
Die RPO sal groter klem op verbruikersopvoeding lê om die plaaslike mark te laat groei en die deurlopende vraag na rooivleis te vergroot.
Dit is ook belangrik om vermoëns ten opsigte van hulpbronne, insluitende menslike hulpbronne en finansies, te beter, terwyl die bewaring en optimale benutting van die natuurlike hulpbronne elke produsent se mikpunt behoort te wees.
Volgens Schutte word die RPO as die spreekbuis van die rooivleisprodusente in die formele sektor erken. Die organisasie het ’n goed gevestigde struktuur wat tot op voetsoolvlak kan kommunikeer, en sy kommunikasie met die Regering is op ’n baie hoë vlak. Hy sê daar is uitstekende kundigheid binne die RPO en die organisasie het ’n impak en inspraak as dit kom by navorsing en ontwikkeling.
Schutte sê die RPO speel ook ’n beslissende rol in die aansoek, toepassing en uitvoering van funksies ingevol ge die statutêre heffing. Verder speel die organisasie ’n belangrike rol binne die Rooivleisbedryfsforum. Die organisasie is ook betrokke by die nasionale en provinsiale gesondheidsforums, die veediefstalforums en die roofdierforums. Die RPO het ’n vaartbelynde administrasie en inklusiewe besluitnemingsprosesse.