‘NATUURLIK IS DIT ’N KOMMERSIËLE PROPOSISIE…’
Een van die redes waarom mnr. Pieter Kruger sy veeboerdery op afgetakelde veld tot niet gemaak het, is omdat inkomste marginaal begin raak het weens ’n tekort aan natuurlike kapitaal. “Ons het van die een droogte na ’n volgende begin boer . . .”
Die groter besef dat hulle in ’n ekologies gevoelige gebied en wateropvangsgebied vir die Kougadam boer, het ook sy kop gedraai. “Dit is belangrik om beskerming aan sulke gebiede te gee om ander gebiede, soos die Gamtoosvallei en Port Elizabeth, met watersekerheid uit die opvanggebied te ondersteun.”
Aanvanklik is spekboom aangeplant met die oogmerk dat die verhandeling van koolstofkrediete die inkomste uit veeboerdery kan vervang. “Weens die prys van koolstof het ons egter nog nie begin om krediete te verhandel nie. Ons het wel begin met agtergrondstudies om te bepaal wat die koolstofinhoud van ons veld was.”
As die Baviaanskloofboere in koolstofkrediete wil handel dryf, moet die projek gesertifiseer word. “Dit is belangrik om die restourasieprojek uit te brei om die sertifiseringskoste te regverdig. Intussen groei ons spekbome en die koolstofinhoud van die veld neem toe. Ek noem dit ’n belegging in natuurlike kapitaal.”
Teen die agtergrond van watersekerheid beskou hy dit beslis as ’n kommersiële proposisie. “Ons moet begin om anders te begin dink. ’n Nuwe ekonomie moet ontwikkel word wat restourasieprojekte ondersteun en volhoubaar maak. Hoe anders gaan ons rivierstelsels beskerm?”
Pieter meen betaling vir ekostelseldienste is een van die ekonomieë wat ontwikkel moet word. “Onthou, die voordeel van restourasie op plase gaan die voordeel van watersekerheid verplaas na die waterverbruiker aan die onderkant van die ketting. Dit is in nasionale belang. Die Departement van Waterwese sal beslis meer betrokke moet raak om hierdie bate te bestuur.
“Die waarde van skoon water uit ’n rivier of opvangsgebied in die Baviaanskloof is drie keer meer werd as die waarde van landbouproduksie. Die herstel van rivierstelsels en opvangsgebiede en die funksie van die ekologiese reserwe is steeds die goedkoopste opsie vir watersekerheid as jy dit vergelyk met die bou van nuwe damme en die ontsouting van seewater. Wat help dit om nuwe damme te bou wat toeslik en dan lê die fout by die opvangsgebied?”