DIEP SPORE
Mnr. Roelie Venter (46), nuwe uitvoerende bestuurder van die Namibiese Landbou-unie (NLU), het al baie spore in dié land getrap. Hy is op Lindley in die Vrystaat gebore waar sy pa, wyle Johan Venter, geboer het. Sy ma, Gerrie, woon steeds op Lindley.
Roelie het ná skool die grade B.Sc.Agric. (dier- en weidingkunde en landbouekonomie) en B.Sc.Agric. Hons. aan die Universiteit van die Vrystaat in Bloemfontein en die graad M.B.A. in sakeleierskap aan die Universiteit van Suid-Afrika (Unisa) verwerf.
In 1994 en 1995 was hy ’n voorligtingsbeampte by die departement van landbou op Potchefstroom. Einde 1995 het hy na Namibië verhuis waar hy sedertdien werk en burgerskap verwerf het.
Roelie se eerste werk in Namibië was as bestuurder van kommoditeite (suiwel, vleisbeeste en akkerbou) by die NLU. Daarna het hy by Namibia Dairies en O&L Boerdery gewerk, waarna hy vir vyf jaar ’n onafhanklike landbouraadgewer was.
Van 2015 tot 2017 was die NLU een van Roelie se kliënte as koördineerder vir ’n projek wat deur die Europese Unie gefinansier is om ’n nasionale weidingbestuursbeleid- en strategie vir Namibië in werking te stel. Dit het gelei tot sy suksesvolle aansoek om die nuwe uitvoerende bestuurder te word.
Roelie woon in Windhoek, maar het ook ’n boerdery suid van Buitepos naby die grens met Botswana. Hy het van 2001 af grond gehuur en vier jaar gelede die plaas gekoop. Vandag boer hy daar met Beefmasterbeeste.