BOERE VERDIEN R7,5 MILJARD
Namibiese boere het verlede jaar sowat R7,5 miljard uit hul boerderye verdien, waarvan ’n groot deel met die uitvoer van produkte was. Dit lewer ’n waardevolle bydrae tot hierdie land se ekonomie en verdien broodnodige valuta.
Die beessektor is verreweg die waardevolste met ’n beraamde boere-inkomste van R3,4 miljard, volgens die Namibiese Landbou-unie (NLU).
Mnr. Roelie Venter (46), uitvoerende bestuurder van die NLU, sê die bedrae is bereken op grond van formele bemarkingsyfers teen die spesifieke jaar se produsentepryse. Geen informele bemarking is daarby ingesluit nie.
Die beessektor word gevolg deur pluimvee (R851 miljoen), druiwe (R819 miljoen), skape (R705 miljoen) en trofeejag (R540 miljoen).
Die tabel hieronder bevat die volledige besonderhede van 2017 se landbouproduksie vergeleke met 2016.