VOORSITTER

Mnr. Piet Gouws (foto) is voorsitter van die Namibiese Lewendehaweprodusente-organisasie (LPO). Hy het in Windhoek skoolgegaan en die graad B.Sc.Agric. (weiding en veekunde) aan die Universiteit van die Vrystaat (UV) behaal. Daarna het hy as landbouvoorligter by die destydse eerstevlakregering van Suidwes-Afrika/ Namibië gewerk.

Nadat hy sy honneursgraad in voedingkunde met deeltydse studie aan die UV verwerf het, het Piet gewerk vir die Italiaanse Banadei-familie, wat 92 000 ha beesgrond vanaf noord van Tsumeb tot suid van Windhoek gehad het.

Hy en sy vrou, Mariana, oorspronklik van die Vaalharts-besproeiingskema, is in 1983 getroud en hulle boer sedert 1990 met Simbras op hul plaas noordwes van Outjo.

VREDE EN VOORSPOED

Ek is geesdriftig oor die georganiseerde landbou en hoopvol oor die toekoms van die landbou en die kommersiële boere. Namibië is nie die maklikste land om in te boer nie, maar ’n beter land met beter mense en méér seëninge en vrede sal jy moeilik vind.

Die totale veesektor is vir die LPO van groot belang. Gevolglik beywer die organisasie hom deurlopend vir ’n regverdige bestel vir groot- en kleinvee, maar ook vir die groot én die klein boer.