Heerlike huiskos

Karen Hart, kosredakteur van die tydskrif Kuier, is op haar gelukkigste in die kombuis agter die kospotte. En sy weet hoe om mondwaterlekker te kook met alledaagse bestanddele, soos die resepte in haar boek Toor met hoender getuig. Karen het meer as 100 van haar beste hoenderresepte in die boek saamgevat — vir slaai, sop, bredie, pasta, oondgebraaide geregte en die braai. Alles is maklik om te maak en bevat bekende bestanddele waarvoor jy nie in ’n deli hoef te gaan soek nie. Kort op die hakke van Toor met hoender volg Karen se volgende boek, Maalvleis, met 130 maklike resepte met dié weeksaandstaatmaker. Wie van ons kan nie doen met ’n paar nuwe gougaaren sakpas-aandete-idees met maalvleis nie? Toor met hoender en Maalvleis deur Karen Hart word deur Human & Rousseau uitgegee en kos R260 elk.