NUWE SA TAFELDRUIFKULTIVAR WÊRELDWYD BEKEND GESTEL
DIE nuwe Suid-Afrikaanse tafeldruifkultivar Joybells is op die ekspo Fruit Logistica in Berlyn aan die wêreld bekend gestel.
“Danksy die kultivar se unieke eienskappe is ons daarvan oortuig dat Joybells wêreldwyd ’n gunsteling sal raak,” het dr. Leon von Mollendorff, bestuurder van die vrugtebemarkingsmaatskappy Culdevco, op die bekendstelling by die Suid-Afrikaanse stalletjie by dié toonaangewende skou gesê.
Volgens me. Phyllis Burger, plantteler by die Landbounavorsingsraad (LNR) se Infruitec-Nietvoorbij-instituut vir Vrugte, Wingerd en Wyn, is hierdie nuwe, rooi, pitlose kultivar geteel uit Sunred Seedless, ’n oop bestuiwer.
Mnr. Bongani Ndimba, senior navorsingsbestuurder by die LNR, sê dit het sowat 15 jaar geduur voor die kultivar beskikbaar gestel kon word.
Dit is ’n vroeë kultivar wat sowat ’n week tot tien dae ná Flame geoes word. Dit is vrugbaar en bars nie maklik nie.
Von Mollendorff sê al die markte waar Joybells getoets is, was gaande oor die kultivar.
Sowat 50 000 kartonhouers (4,5 kg elk) Joybells-druiwe is die afgelope twee produksiejare na Brittanje en Europa uitgevoer. Dit is ook vanjaar vir die eerste keer na die Verre-Ooste gestuur. Die druiwe word tans deur 12 Suid-Afrikaanse uitvoermaatskappye versprei.
“Vir verspreiders is dit ’n goeie kultivar, want Joybells ‘reis’ baie goed en vaar uitstekend in koue opberging. Die kleinhandel en verbruikers sal daarvan hou omdat dit pitloos is en ’n goeie tekstuur het (crunchy). Die druiwe het goeie korrelaanhegting, ’n lekker geur en ’n aantreklike kleur. In wese is dit alles wat ’n verbruiker van ’n tafeldruifkultivar kan begeer.”
Daar is al sowat 200 ha Joybellswingerde in Suid-Afrika aangeplant. Sowat 80% daarvan is in die Hexriviervallei, gevolg deur die Oranjeriviergebied en ’n bietjie in die Bergriviergebied. Ongeveer 100 ha is al in drag. Die kultivar is nog nie elders in die wêreld gevestig nie.
“Ons probeer aan Suid-Afrikaanse produsente ’n voorsprong gee om Joybells te plant omdat dit ’n Suid-Afrikaanse produk is en deur die bedryf gefinansier is.”