DROOGTE DEMP NIE VRAAG

ANGUS ’n Goeie vraag na Angusbeeste heers in al die beesproduksiegebiede van Suid-Afrika, ten spyte van die min reën wat tot onlangs oor ’n wye gebied geval het.

Mnr. John Boulle, rasdirekteur van die Angus-beestelersgenootskap van Suid-Afrika, sê die kommersiële kuddebouprogram waarvolgens die land se nasionale kudde ná die droogtetoestande van die afgelope jare aangevul word, vorder stadig, maar seker. ’n Goeie vraag na dragtige en niedragtige Angus-tipe diere word ondervind. Een van die beperkende faktore is die tekort aan kontantvloei.

Volgens Boulle se verwagting kan die gemiddelde prys van geregistreerde, prestasiegetoetste Angusbulle vanjaar met sowat 21% tot R49 000 styg. Sowat 690 bulle is verlede jaar teen gemiddeld R40 400 stuk verkoop.

“Dié prysverwagting is bekostigbaar, veral aangesien speenkalwers gemiddeld R7 000 stuk behaal en dat bulle se waarde ingevolge die algemene reël van sewe speenkalwers per bul bepaal word,” sê hy. “Bultelers moet egter in ag neem dat kommersiële telers die reproduktiewe lewe van ouer bulle uitrek, veral as hulle deur veeartse as siektevry en vrugbaar verklaar is.”

Boulle sê die Angus is veral in kommersiële kuddes gesog as versbulle danksy hul lae geboortegewig van gemiddeld 35,4 kg. Rasegte Angusspeenkalwers het verlede jaar gemiddeld 234 kg geweeg, wat vanweë basterkrag in kalfkruisings aansienlik hoër sal wees.

— JOHAN NORVAL