Gevaarlike VSA-onkruid dalk in SA

VRESE bestaan dat een van Amerika se mees verwoestende onkruide by katoen, mielies en sojabone (foto) die afgelope twee maande in katoenlande naby Douglas opgespoor is.

Landbouweekblad het betroubaar verneem dat plantmateriaal van ’n plant wat morfologies ooreenstem met die gevreesde

Amaranthus palmeri tans DNS-toetse ondergaan om te bevestig dat dit wel dié plantsoort is.

Landboukundiges by GWK het bevestig dat plantmateriaal van dié plant, wat skynbaar weerstand teen sekere bekende onkruiddoders bied, vir DNS-ontleding na Pretoria gestuur is, maar wou nie meer sê voor daar nie sekerheid is oor watter soort Amaranthus dit is nie. Die toetsuitslae sal na verwagting oor ’n maand bekend wees.

WEERSTANDIG

Volgens die webwerf van die Amerikaanse deelstaat Minnesota se departement van landbou het dié plant weerstandigheid opgebou teen “talle klasse plantdoders en hul verskillende maniere van werking, wat dit moeilik en duur maak om te bekamp”.

Volgens die webwerf kan een plant tot 250 000 sade produseer. Dit is uiters mededingend met ander plante en inhibeer die groei van die gewasse waartussen dit groei, aangesien dit van 2 duim tot 3 duim (5-7 cm) per dag groei en tot 2 m hoog kan word.

Volgens die webwerf is opbrengsverliese van tot 91% by mielies en 79% by soja in sommige Amerikaanse deelstate aangemeld.