Kom help skaaf aan buffelprotokol
DIE eerste Aldam-wildskool bied aan buffelboere die geleentheid om self te kom help om probleme met die buffelprotokol (VPN) uit te stryk.
’n Vergadering onder leiding van mnr. Reuben Saayman, voorsitter van die Buffeleienaarsadvieskomitee van Wildbedryf Suid-Afrika (WRSA), vind op 14 Maart by die Wildskool plaas om wildboere die kans te gee om bydraes oor die omstrede protokol te lewer.
Mnr. Francoaise Schutte, die eienaar van die Mbogo-wildboerdery by Theunissen en me- de-aanbieder van die Wildskool, sê buffelboere sukkel al jare lank om dele van die protokol verander tekry.
Versoeke het egter tot dusver by die Departement van Landbou, Bosbou en Visserye se veeartsenyafdeling op dowe ore geval.
Die WRSA hou reeds die afgelope agt jaar elke jaar ’n buffelvergadering by Onderstepoort waar hul probleme geopper en voorstelle gemaak is.
HOFSAAK
Die knelpunt het hernude dringendheid gekry nadat mnr. Jaco Troskie, ’n bekende wildboer en sakeman, verlede Oktober ’n hofbevel bekom het wat die buffelprotokol as ongeldig en onafdwingbaar verklaar het.
Die hofbevel het die Minister van Landbou, Bosbou en Visserye 60 dae gegee om oor ’n nuwe protokol met buffelboere te onderhandel en te beding, maar volgens Schutte is dit nog nie gedoen nie.
Wat buffelboere veral dwars in die krop steek, is dat ander soorte wild, beeste, skape en bokke van een deel van Suid-Afrika na ’n ander deel vervoer mag word sonder dat die diere vooraf vir siektes getoets word, maar nie buffels nie.
Toetse wat op buffels gedoen word, is vir bek-en-klouseer, korridorsiekte, besmetlike misgeboorte en tuberkulose. Schutte sê hulle het nie ’n probleem om diere vir bek-en-klouseer en korridorsiekte te toets nie, maar wel vir besmetlike misgeboorte en tuberkulose.
“Volgens ’n stelling wat op ’n buffelkongres by Onderstepoort gemaak is, het sowat 40% van die 26 miljoen beeste in Suid-Afrika brucellose én tuberkulose onder lede. Ons meen ons moet dieselfde vergunning vir dié twee siektes kry. Dan is dit die buffelteler se verantwoordelikheid om te sorg dat sy kudde skoon is.
“Wat hom sal motiveer, is dat hy ’n sertifikaat vir sy kudde moet kan uitreik; anders koop niemand buffels by hom nie,” sê Schutte.
DNS-toetse en ’n groter rol deur wildveeartse in die bekamping van siektes sal ook op die Wildskool bespreek word.