Veldwagters, renosters
Die daaglikse stryd wat veldwagters teen stropers voer, lei in baie gevalle tot ernstige trauma en stres.
en die stropers
Baviaanskloof. By koördinate 33° 30’ 52” Suid en 23° 48’ 55” Oos, as ’n mens van die pad af suid kyk, sien jy die rotsformasie wat “Renosterkop” gedoop is. Gegewe die regte tyd van die dag wat son, weerkaatsings en skaduwees betref, lyk dit soos die profiel van ’n renoster . . . in my verbeelding altans.
En ek wonder of hierdie rotsformasie dalk eendag die laaste monument vir die ikoniese dier, die renoster, sal wees.
BELANGRIKE EKOLOGIESE ROL
Renosters word gesien as sleuteldiere danksy hul groot invloed op die ekosisteem. ’n Ander titel wat hul toekom, is dié van ekologiese ingenieurs, aangesien hulle help om plantegroei te verander wat help om ’n leefbare habitat vir ander diersoorte te skep.
Die swartrenoster, ’n blaarvreter, bekamp bosindringing en hou die ruigtes oop vir an- der blaarvreters. Die witrenoster speel ’n belangrike rol in die skep van weidingsgrasperke (grazing lawns) – lappies grond met ’n hoë voedingstofdigtheid waar verskeie ander grasvreters, soos buffels en wildebeeste, kom besoek aflê.
STATUSSIMBOOL
Meer as 7 100 renosters is al die afgelope dekade deur stropers doodgemaak. “Vir wat?!” gil ek in my binneste. ’n Kulturele bygeloof en valse opvatting in die Ooste, veral onder Chinese wat glo dat renosterhoring sekere helende eienskappe besit, is die dryfkrag vir hierdie uitwissing. Renosterhoring besit geen magiese eienskappe nie – dit is net keratien, soos in jou naels, het internasionale navorsers bevestig. In Viëtnam word renosterhoring gesien as ’n absolute statussimbool en ’n teken van rykdom. Vroeër jare in Jemen is die handvatsel van die jambiya, ’n tipe dolk, van renosterhoring gemaak. Dit was ’n teken wat jou status in die gemeenskap bevestig het. In 1992 het die sjeik van die Bakil-stam, Jemen se grootste en invloedrykste stam, een miljoen dollar vir ’n jambiya betaal.
’n Renosterhoring behaal tans $60 000 op die swart mark. Die internasionale, onwettigeha ndel dryf in wild maak deel uit van die groter transnasionale misdaadnetwerk wat ongeveer $20 miljard werd is.
In ’n onlangse akademiese artikel word beweer dat indien daar nie ingryping is nie, vrylopende renosters in ’n natuurlike omgewing teen 2035 sal uitsterf.
Wildreservate is stropers se hoofteiken, met die Krugerwildtuin wat die swaarste getref word weens sy ligging naby Mosambiek. Daar is reeds menige organisasies wat veg vir die renosters se oorlewing.
‘WETENSKAP’ VAN STROPERY
Die veldwagters is tans die bewaarders van hierdie lid van die Vyf Grotes. Hulle vorm die eerste en laaste linie van verdediging teen