TWEE-BUFFELSGESCHIET, COLIGNY
Vuurwapens in die 1800’s kon sonder twyfel twee buffels met een skoot doodskiet. Trouens, baie van destyds se skietgoed laat vandag se gewere soos ’n windbuks lyk, skryf Lucas Potgieter in sy rubriek “Die boer en sy roer” na aanleiding van ’n leser se vraag.
Die leser, J.T. Scott van Sunnyside in Pretoria, vertel in sy brief van die plaas Twee-BuffelsGeschiet in die distrik Coligny, wat oorspronklik in April 1866 deur die Zuid-Afrikaansche Republiek aan sy oorgrootjie Albertus Petrus de Nysschen oorgedra is.
De Nysschen was volgens oorlewering ’n knap skut en het by geleentheid twee buffels by ’n fontein op die plaas met een skoot doodgeskiet. Dit was voordat die plaas aan hom toegeken is.
Scott skryf sy oorgrootjie se bekwaamheid as skut word soms in twyfel getrek en dan word onnodig lang name, soos Twee-buffels-met-een-skootmorsdood-geskiet-fontein, aan die plaas toegedig.
Na aanleiding van sy oorgrootjie se prestasie wil hy weet of die gewere van destyds wel die trefkrag gehad het om twee buffels met een skoot dood te skiet.