A. PALMERI SE OPMARS OOR AMERIKA

Amaranthus palmeri (S. Watson) is ’n eenjarige, someronkruidsoort, en een van 75 spesies in die familie Amaranthaceae wat wêreldwyd voorkom.

A. palmeri (algemene name: Palmer amaranth; careless

weed) is inheems aan die noordelike dele van Mexiko en die suidwestelike dele van

Amerika. Oor die afgelope dekade het dit vinnig versprei na ander dele van Amerika deur die vervoer van saad en landboutoerusting, asook landboupraktyke.

Weens sy uiters nadelige effek by katoen, mielies en soja word die plant in die deelstate Delaware, Minnesota en Ohio wetlik geklassifiseer as onwettige, skadelike onkruid. Soortgelyke klassifikasie word ook oorweeg in ander state.

In 1995 is die plant net in

twee suidelike deelstate as die skadelikste onkruid by katoen beskou. Teen 2009 was dit die skadelikste in nege suidelike deelstate by katoen en die tweede skadelikste onkruid by soja. Teen 2014 was dit die ekonomies belangrikste onkruidspesie in Amerika by katoen, mielies én soja.

Dit is in 2016 ook die eerste keer in Argentinië aangetref. Verskeie Amaranthusspesies kom in Suid-Afrika voor – sommige inheems en ander uitheems, maar almal nou algemeen. Die plante is algemeen bekend vanweë hul hoë voedingswaarde; die algemene tradisionele naam vir plante met hierdie nut is marogo of marog. Sommige spesies, soos

A. hybridus (misbredie of hanekam), is probleemplante in gewaslande waar hulle bekamp moet word om opbrengsverliese te voorkom, maar van hulle word ook verbou as voedselbron.