WOORDFEES | Groot geeste bespreek landboubrandpunte
Leierboere, bedryfsleiers en akademici gaan tydens die US Woordfees in Stellenbosch die afgelope eeu van die landbou onder die loep neem en terselfdertyd ’n blik werp op die toekoms van die bedryf.
Die fakulteit landbouwetenskappe was een van die eerste departemente wat gestig is toe die Universiteit Stellenbosch (US) in 1918 tot stand gekom het. Sedertdien het die universiteit, landbounavorsingsgenote en die boere in die distrik daartoe bygedra dat Stellenbosch in die afgelope 100 jaar tot een van die spilpunte van die Suid-Afrikaanse landbou ontwikkel het.
Die eerste vier sessies van die landboudebat tydens die Woordfees handel onderskeidelik oor die wyn-, vrugte- en veebedryf en landbouekonomie. Die gesprekleiers is Lucille Botha, assistentredakteur van Land
bouweekblad, en proff. Mohammad Karaan van die fakulteit landbouwetenskappe by die US en Johann Kirsten, direkteur van die buro vir ekonomiese navorsing aan die US.
In die laaste sessie op 9 Maart sal prof. Andreas van Wyk, voormalige rektor van die US, met Karaan, voormalige dekaan van die fakulteit landbouwetenskappe, en prof. Danie Brink, huidige dekaan, in gesprek tree.
Die besprekings is van 5 tot 9 Maart om 14:30 by Bloekomhoek (op die hoek van Ryneveld- en Victoriastraat, Stellenbosch). Toegang is gratis.