VENESIË SE GONDELIERS DRA WEER WOL
VENESIË se gondeliers gaan vir die eerste keer in dekades weer wol dra nadat die Australiese bemarkingsliggaam Australian Wool Innovation (AWI), die Wolmerk-maatskappy (TWC) en Emilio Ceccato, die amptelike klereverskaffer van die gondeliersvereniging, saamgewerk het om nuwe woluitrustings aan die gondeliers te voorsien.
Gondels word reeds sedert 1 200 v.C. gebruik om mense deur die kanale van dié beroemde Italiaanse stad te vervoer en is vandag een van die grootste toeriste-aantreklikhede. Daar is 433 geregistreerde gondeliers.
Die kwota vir gondelierslisensies is vasgepen en lisensies kan net van pa na seun of dogter oorgedra word. Die lisensie kan slegs verkoop word as daar geen nasaat is nie.
Die plan om die gondeliers te gebruik om wol te bevorder, het twee jaar gelede ontstaan toe mnr. Stuart McCullough, uitvoerende hoof van die AWI, vir ’n vergadering
met die Wolmerk-maatskappy se strategiese raadgewer in Venesië was. Sy hotel het op die groot kanaal uitgekyk met ’n opklimpunt reg voor die hotel waar die gondels toeriste op- en afgelaai het.
Hulle het Emilio Ceccato genader en in September verlede jaar is ’n reeks woluitrustings vir gondeliers bekend gestel. Die reeks bestaan uit onder meer ’n polohemp, ’n langmoutrui en ’n opgestopte, moulose baadjie van ’n waterwerende wolstof wat met wol gestop is. Die uitrustings is in die tradisionele kleure van vlootblou, rooi en wit strepe.
Die logo van die gondeliersvereniging en ’n groot wolmerk pronk op elke kledingstuk. Die grootste bevorderingsaspek is dat die publiek ook dié kledingstukke in ál die takke van Emilio Ceccato kan koop of van sy webtuiste by www.emilioceccato.com kan bestel.
As deel van sy kontrak sal Emilio Ceccato elke jaar nuwe uitrustings aan die gondeliers verskaf. Die reeks sal later uitgebrei word om katoen en ander stowwe te vervang en selfs T-hempe van wol aan die gondeliers te verskaf.