NUWEKANOLAKULTIVARS VIR MEELMARK OP PAD
Hoëproteïen-kanolameel kan binnekort nuwe deure vir dié gewas op die wêreldmark oopmaak, meen mnr. Chris Nowlan, bemarkingsbestuurder vir kanolaprodukte by die maatskappy Dow AgroSciences.
Suid-Afrikaanse boere, wie se kanola deur die Soill-aanleg in Swellendam tot olie en meel verwerk word, kan ook baat vind.
Chris skryf in ’n nuusbrief van die tydskrif Seed World kanola is ’n baie goeie oliegewas. Oesopbrengste het die afgelope tien jaar sterk gegroei sodat dit deesdae ’n hoogs winsgewende kommersiële gewas vir boere in lande soos Kanada en Amerika is. Tradisionele kultivars se kanolameel het egter ’n hoë veselinhoud. Hoewel dit baie geskik is as voerbestanddeel vir herkouers, soos in die melkbedryf, kan die produsente van monogastriese lewende hawe, soos varke, dit nie doeltreffend benut nie. Planttelers het egter die afgelope paar jaar hard gewerk om kanolakultivars te ontwikkel wat ’n hoër proteïeninhoud en ’n laer veselinhoud het. Dié saad is nou naby aan kommersiële beskikbaarheid en die meel van hierdie kultivars behoort goed met byvoorbeeld sojameel te vergelyk. Die proteïeninhoud behoort sowat 44% te wees. Dit is soortgelyk aan dié van sojameel en sowat 37% meer as wat konvensionele kanolameel bevat.
Dít kan wêreldwyd nuwe markruimte vir kanola op die veevoermark open, sê Chris.
— MARLEEN SMITH