UITPAKSYFER VERBETER MET 50%
Mnr. Gottlieb Venter verduidelik hoe hy te werk gegaan het om ’n 90%-uitpaksyfer te behaal in grond wat slegs ’n paar jaar gelede vrot van die aalwurms was en slegs ’n 60%-uitpakpersentasie kon oplewer.
Grondvoorbereiding. ’n Dekgewas bestaande uit bladramnas, voersorghum en hawer of ’n kombinasie van akkerbone of mielies en rape word fyn gekerf en vlak ingeploeg. Die stappe moet so gou moontlik ná mekaar plaasvind om soveel moontlik plantensieme te behou. Hoe vinniger die inwerkaksie plaasvind, hoe korter is die stikstof-negatiewe periode en hoe groter is die koolstoftoename in grond.
Die kalkregstellings word altyd 4% hoër as die ideale basisversadiging van kalsium (Ca) aanbeveel en toegedien. Met die kalktoediening dien Gottlieb 20 liter Mos Woema en 25 kg humate per hektaar toe. Dit word ingewerk en dan natgemaak (van 5 mm tot 10 mm besproeiing, na gelang van die grondvogstatus). Gottlieb plant sowat drie tot vier weke ná hierdie toediening.
Tydens plant. ’n Ekstra 30 kg humate per hektaar (in korrelvorm) word op die wortelplantrye uitgestrooi tydens plant. Dan word ’n mengsel van Mos Nema (aalwurm), Mos Phito (grondpatogene), Mos Tricho (plantimmuniteit), fulviensuur en vis-emulsie teen 20 liter per middel per hektaar deur die spilpunt of met ’n trekker en balkspuit toegedien.
Tydens groeityd (90 dae lank). Blaarmonsters word vanaf week drie ontleed. Na gelang van die uitslae word regstellings deur blaarvoeding gedoen. Plante word sodoende gestimuleer om die beskikbare basisvoeding in die grond beter te benut.
Biologiese plaagbestryding. Deur geïntegreerde plaagbestryding toe te pas word bepaal met watter stappe en teen watter dosis teen watter plaag opgetree moet word. ■ Teen aalwurm dien Gottlieb met ’n balkspuit ekstra Mos Nema (20 liter/ha) en fulviensuur (10 kg/ha) toe. ■ Teen bakteriese roes dien Gottlieb kopersulfaat (CuSO4) teen 2 kg/ha saam met Super Sulph teen 5 liter/ha toe. ■ As die eerste besmetting van Alternaria spp. gewaar word, dien Gottlieb Mos Phito, Mos Tricho, humate (5 kg/ha) en vis-emulsie toe. Biologiese behandeling kan afgewissel word met chemiese behandeling na gelang van die intensiteit van die besmetting.