VELDDAG VIR BOERE IN NAMAKWALAND
Veeboerdery is een van die belangrikste ekonomiese aktiwiteite in Namakwaland, dog die produktiwiteit van weiveld is onder druk.
Namakwaland lê in die Sukkulente-Karoo, een van 25 biodiversiteitsbrandpunte in die wêreld. Biodiversiteitsbrandpunte is gebiede wat ’n hoë mate van biodiversiteit huisves, maar wat ook onder groot druk verkeer.
Boere en navorsers is bekommerd oor die agteruitgang van weipotensiaal en biodiversiteit. Die huidige droogte vererger die agteruitgang.
Landbouweekblad en die Kamieskroon-boerevereniging hou in Maart ’n praktiese velddag in Namakwaland om boere te help om hul veld beter te verstaan, te benut en te bestuur. Die velddag is op Vrydag 9 Maart vanaf 09:00.
Sprekers wat demonstrasies van veldrestourasiemetodes en gesprekke oor die eienskappe van plante met boere sal lei, is: ■ Me. Annelise le Roux, plantkundige en skrywer van Wild flowers of Namaqualand, een van die Botaniese Vereniging se gewilde veldblomgidse; ■ Me. Halcyone Muller, bestuurder van restourasie en boerdery by Conservation International, en ■ Mnr. Ben-Jon Dreyer, grondonderhandelaar by die Wilderness-stigting Afrika.
Almal kom saam op die plaas Brakkies, by Kamieskroon, voordat veld toe vertrek word.