BIOLOGIESE OPLOSSINGS VIR TUINIERS, BOERE
Livingseeds, ’n saadmaatskappy met sy hoofkantoor in Henley-on-Klip in die Vaaldriehoek, verkoop benewens erfenisgroente nou ook goggas wat as natuurlike vyande teen siektes en plae ingespan kan word.
Dié nuwe produkte, die resultaat van ’n vennootskap met die maatskappy BioBee, is geskik vir tuiniers en kleinboere. BioBee bedien onder meer vrugte- en groenteboere met oplossings vir biologiese bekamping as deel van ’n geïntegreerde plaagbestrydingsprogram.
Vroeër het dit vir huistuiniers en kleinboere, wat nie soos groot kommersiële boere honderde houers van een inseksoort wil bestel nie, nie ekonomies sin gemaak om hierdie insekte aan te skaf nie. Nou kan BioBee en Livingseeds met hul gesamentlike koopkrag dit teen bekostigbare pryse in klein hoeveelhede verskaf, volgens die maatskappy.
Bestellings word tot die laaste Maandag van elke maand geneem. Die meeste van die insekte word uit Israel ingevoer, en besendings kom op die eerste of tweede Woensdag van die maand in Suid-Afrika aan. Op dieselfde dag word dit na Livingseeds-klante uitgestuur.
Die maatskappy waarsku daar moet genoeg van die korrekte teikenspesie vir die voordelige insekte wees om op te voed. Die voordelige insekte sal ook maklik vrek op plante wat binne die afgelope twee maande met chemiese middels behandel is. Min van hulle kan op ander voedselbronne, soos stuifmeel of ander soorte insekte, oorleef.
Livingseeds het ook nie ’n roofinsek teen elke plaag nie. Maak dus seker dat jy die regte produk kies. PRYS: R84 tot R1 867, plus koerierkoste.